డ్రగ్స్ కేసులో హీరోయిన్ అరెస్ట్.. బెయిల్ పై విడుదల..!

ఆది సాయికుమార్ సరసన 'బుర్రకథ' సినిమాలో హీరోయిన్ గా నటించిన బాలీవుడ్‌ నటి నైరా నేహాల్‌ షా ను డ్రగ్స్ ఆరోపణలతో ముంబై పోలీసులు అరెస్టు చేసినట్లు వార్తలు వస్తున్నాయి. గత ఆదివారం ముంబై సిటీలోని ఓ హోటల్లో నటి తన స్నేహితులతో కలసి నిర్వహించిన పార్టీలో మాదక ద్రవ్యాలు వినియోగిస్తున్నారనే సమాచారంతో పోలీసులు రైడ్ చేసినట్లు తెలుస్తోంది.

పార్టీ జరుగుతుండగానే పోలీసులు రైడ్‌ చేయగా.. ఆ సమయంలో వాళ్ళు చారస్ సిగరెట్స్ సేవించి ఉండటంతో నైరా షాతో పాటు ఆమె స్నేహితులను కూడా అదుపులోకి తీసుకున్నారని తెలుస్తోంది. నేషనల్ మీడియాలో వస్తున్న వార్తల ప్రకారం నైరా షా తన పుట్టినరోజు సందర్భంగా నగరంలోని ఓ ఫైవ్ స్టార్ హోటల్లో స్నేహితులకు పార్టీ ఇచ్చినట్లు తెలుస్తోంది. దీనికి గోవాకు చెందిన ఆమె ఫ్రెండ్ ఆషిక్ హుస్సేన్ కూడా హాజరయ్యాడు.

పోలీసులు రైడ్ చేసిన సమయంలో వీరిద్దరూ మాదకద్రవ్యాలు డ్రగ్స్(చరాష్) సేవించి ఉండటంతో అరెస్ట్ చేశారు. వీరిద్దరిని బాంద్రా కోర్టులో హాజరుపర్చగా.. తర్వాత వీరికి బెయిల్ లభించినట్లు తెలుస్తోంది. ఇకపోతే ఈ ఘటనపై ఎన్డీపీఎస్ యాక్ట్ ప్రకారం కేసు నమోదు చేసిన పోలీసులు దర్యాప్తు చేస్తున్నారు. వీరికి డ్రగ్స్ ఎక్కడి నుంచి వచ్చాయనే కోణంలో విచారణ జరుపుతున్న పోలీసులు.. వీరికి మాదకద్రవ్యాల్ని సరఫరా చేసిన వారి కోసం గాలిస్తున్నారని తెలుస్తోంది.