‘అజ్ఞాతవాసి’ వల్ల ఆత్మహత్య చేసుకున్నాడా?

ఈ ఏడాది సంక్రాంతికి ఎన్నో అంచనాల మధ్య విడుదలై తీవ్ర నిరాశకు గురి చేసింది ‘అజ్ఞాతవాసి’ సినిమా. ఈ చిత్రంపై పెట్టుబడి పెట్టిన వాళ్లు భారీగా నష్టపోయారు. నిర్మాత కొంత మేర నష్టాల్ని భర్తీ చేసే ప్రయత్నం చేస్తున్నట్లుగా ప్రచారం జరిగింది కానీ.. అయినప్పటికీ బయ్యర్లు చాలా వరకు మునిగిపోయారు. కాకపోతే బయ్యర్లెవరూ బయటికొచ్చి ఈ విషయమై మాట్లాడలేదు. ఐతే నిర్మాత నట్టి కమార్ మాత్రం ‘అజ్ఞాతవాసి’ వల్ల ఒక ఎగ్జిబిటర్ ఆత్మహత్య చేసుకున్నట్లుగా చెబుతుండటం గమనార్హం. డిజిటల్ సర్వీస్ ప్రొవైడర్లకు వ్యతిరేకంగా వారం రోజుల పాటు సమ్మె జరిగిన నేపథ్యంలో దీనిపై స్పందించేందుకు నట్టి కుమార్ ప్రెస్ మీట్ పెట్టి సంచలన ఆరోపణలు చేశాడు.

కొందరు బడా నిర్మాతలు డిజిటల్ సర్వీస్ ప్రొవైడర్లకు కొమ్ము కాయడం వల్లే వాళ్లు ఆ స్థాయిలో డబ్బులు దండుకుంటూ నిర్మాతల్ని ఇబ్బంది పెడుతున్నారని నట్టి కుమార్ ఆరోపించాడు. ఈ ఇష్యూ మీద మాట్లాడిన అనంతరం నట్టికుమార్ ఫోకస్ పవన్ కళ్యాణ్ మీదికి మళ్లింది. ‘అజ్ఞాతవాసి’ వల్ల నష్టపోయిన డిస్ట్రిబ్యూటర్లు.. ఎగ్జిబిటర్లకు కొంత పరిహారం అందిస్తానని నిర్మాత హామీ ఇచ్చారని.. ఐతే ఈ చిత్రం వల్ల నష్టపోయిన ఒక ఎగ్జిబిటర్ ఆత్మహత్య చేసుకున్నాడని నట్టి తెలిపాడు. మరో ఎగ్జిబిటర్ ఆత్మహత్యాయత్నం చేసినట్లు కూడా చెప్పాడు. ప్రజలకు న్యాయం చేయడానికి రాజకీయాల్లోకి వచ్చినట్లు చెప్పుకునే పవన్ కళ్యాణ్.. ముందు ‘అజ్ఞాతవాసి’ వల్ల నష్టపోయిన వారిని ఆదుకోవాలని నట్టికుమార్ డిమాండ్ చేశాడు.