తమిళనాట నాని మరో ప్రయత్నం

యంగ్‌ హీరో నాని ప్రస్తుతం గౌతమ్‌ తిన్ననూరి దర్శకత్వంలో 'జెర్సీ' అనే చిత్రాన్ని చేస్తున్న విషయం తెల్సిందే. క్రికెట్‌ నేపథ్యంలో రూపొందుతున్న ఈ చిత్రం షూటింగ్‌ ముగింపు దశకు చేరుకుంది. రేపు సినిమాకు సంబంధించిన మొదటి పాటను ప్రేమికుల రోజు సందర్బంగా విడుదల చేసేందుకు ఏర్పాట్లు చేస్తున్నారు. రేపు జెర్సీ పాటను తెలుగులోనే కాకుండా తమిళంలో కూడా విడుదల చేయనున్నారట. తమిళంలో ఈ చిత్రంను విడుదల చేసేందుకు నిర్మాతలు ఇప్పటి నుండే ఏర్పాట్లు చేస్తున్నట్లుగా తమిళంలో పాటను విడుదల చేయడంతో అర్థం అవుతుంది.

నాని గతంలో తమిళ ప్రేక్షకుల ముందుకు వెళ్లాడు. కాని ఎక్కువ సార్లు నానికి అక్కడ నిరాశే మిగిలింది. అయితే ఈసారి కాన్సెప్ట్‌ బేస్డ్‌ సినిమా అవ్వడంతో తమిళ ప్రేక్షకులు ఇలాంటి సినిమాలను ఆధరిస్తారనే నమ్మకంతో చిత్ర యూనిట్‌ సభ్యులు తమిళంలో కూడా జెర్సీని విడుదల చేసేందుకు ప్రయత్నాలు చేస్తున్నారు. జెర్సీ చిత్రం విడుదల తేదీపై పునరాలోచనకు యూనిట్‌ సభ్యులు వచ్చారు. కారణం తెలుగుతో పాటు తమిళంలో కూడా ఈ చిత్రాన్ని ఒకేసారి విడుదల చేసేలా ప్లాన్‌ చేస్తున్నారట.

శ్రద్దా శ్రీనాధ్‌ హీరోయిన్‌ గా నటిస్తున్న ఈ చిత్రంలో నాని క్రికెటర్‌ గా కనిపించబోతున్నాడు. లేటు వయసులో క్రికెట్‌ లో రాణించేందుకు హీరో చేసే ప్రయత్నాలను దర్శకుడు గౌతమ్‌ మనసుకు హత్తుకునే సీన్స్‌ తో చేస్తున్నాడట. ఇటీవల విడుదలైన టీజర్‌ తో సినిమాపై ఆసక్తి పెరిగింది. తమిళ ఆడియన్స్‌ అభిరుచికి తగ్గట్లుగా ఈ చిత్రం ఉంటుందనే ఉద్దేశ్యంతో అక్కడ విడుదల చేయాలని నిర్ణయించారు. మరి నాని ఈ చిత్రంతో తమిళనాట సక్సెస్‌ ను దక్కించుకుంటాడో చూడాలి. తెలుగులో మాత్రం జెర్సీ చిత్రం తప్పకుండా విజయాన్ని సొంతం చేసుకుంటుందనే నమ్మకం ఎక్కువ శాతం మందిలో వ్యక్తం అవుతోంది.