అప్పుడు హీరోగా.. ఇప్పుడు విలన్ గా..

చాలా సంవత్సరాల క్రితం.. దర్శకుడు తేజ మాంచి ఫామ్ లో ఉన్నప్పుడు.. తన ఫామ్ కోల్పోవడానికి ఆయన వేసిన తొలి స్టెప్.. ''జై'' అనే సినిమా. ఈ సినిమాతో ఆయన ఒక కుర్రాడిని హీరోగా పరిచయం చేశాడు. ఆ కుర్రాడు పెరిగి ఒక చిన్న హీరో అయ్యాడే కాని.. ఉదయ్ కిరణ్‌ అండ్ నితిన్ రేంజ్ స్టార్ కాలేకపోయాడు. అందుకే ఇప్పుడు అతడిని స్వయంగా విలన్ చేస్తున్నాడా?? అంటే అవుననే అంటున్నారు ఫిలిం నగర్ వర్గాలు.

ఇంతకీ మనం మాట్లాడుతోంది.. టాలెంటెడ్ హీరో నవదీప్ గురించే అని అర్ధమైందిగా. అయితే ఈ మధ్యన నవదీప్ హీరోగా అంతగా రాణించట్లేదు. అందుకే కొన్ని సినిమాల్లో సైడ్ క్యారక్టర్లు కూడా చేస్తున్నాడు. ఇప్పుడు ఏకంగా ఫుల్ టైమ్ విలన్ అవుతున్నాడనే టాక్ వినిపిస్తోంది. ఆల్రెడీ రామ్ చరణ్‌ ధృవ సినిమాలో కీలకమైన స్నేహితుడి క్యారక్టర్ పోషించిన నవదీప్.. ఇప్పుడు రానా దగ్గుబాటితో దర్శకుడు తేజ తీయబోయే సినిమాలో విలన్ గా మారుతున్నాడట. తనని పరిచయం చేసిన డైరక్టరే ఇలా విలన్ గా మార్చేయడం పెద్ద విషయమే మరి.

రానా ప్రస్తుతం బాహుబలి షూటింగ్ చివరి దశల్లో ఉన్నాడు. ఒక్కసారి ఈ షూటింగ్ పూర్తయిపోగానే చాలా సినిమాలు చేయనున్నాడు. అందులో మొదటిది.. సురేష్‌ బాబు స్వయంగా ప్రొడ్యూస్ చేస్తున్న దర్శకుడు తేజ సినిమా. ఈ సినిమాలో కాజల్ అగర్వాల్ హీరోయిన్ గా నటిస్తోంది. క్యాథరీన్ త్రెసా మరో హీరోయిన్ అని తెలుస్తోంది.

Like Us on Facebook : https://www.facebook.com/Tupakidotcom/