ఇప్పుడైనా కెరీర్ మారుతుందా?

కొన్నిసార్లు అదృష్టం కలిసొస్తే టాలెంట్ బొటాబొటిగా ఉన్న కూడా నెట్టుకెళ్లిపోవచ్చు. అలాగే ఎంత టాలెంట్ ఉన్నా అదృష్టం కలిసి రాకపోతే ముందుకు సాగడమూ కష్టమవుతుంది. టాలీవుడ్ యంగ్ హీరో నవీన్ చంద్ర రెండో కోవకు చెందిన వాడని చెప్పొచ్చు. తొలి సినిమా ‘అందాల రాక్షసి’తోనే తన టాలెంట్ ఏంటో చూపించాడు నవీన్. కానీ ఆ సినిమా ఆశించిన స్థాయిలో ఆడలేదు. ఆ తర్వాత అవకాశాలు వచ్చాయి కానీ.. ఏవీ కూడా అంతగా ఉపయోగపడలేదు. సోలో హీరోగా నటించిన సినిమాలన్నీ నిరాశ పరచడంతో చాలా త్వరగా ఫేడవుట్ అయిపోయాడు. ఇలాంటి సమయంలో ఇక లాభం లేదని హీరో పాత్రలు వదిలేసి.. క్యారెక్టర్.. నెగెటివ్ రోల్స్ చేయడానికి కూడా అతను రెడీ అయ్యాడు. ‘నేను లోకల్’లో నెగెటివ్ టచ్ ఉన్నపాత్ర చేశాడు. కానీ ఆ సినిమా బ్లాక్ బస్టర్ అయినప్పటికీ.. నవీన్ పాత్రలో పెద్దగా విశేషం ఏమీ లేకపోవడంతో అతడి కెరీర్‌లో పెద్దగా మార్పు లేకపోయింది. దీంతో నవీన్ పరిస్థితి అయోమయంగా తయారైంది.

కానీ ఇలాంటి తరుణంలోనే ఎన్టీఆర్-త్రివిక్రమ్‌ ల క్రేజీ కాంబినేషన్లో తెరెకెక్కుతన్న ‘అరవింద సమేత’లో అవకాశం దక్కించుకున్నాడు నవీన్. ఐతే టీజర్.. ట్రైలర్లలో నవీన్ కు చోటే లేకపోవడంతో మరోసారి అతడికి అన్యాయం తప్పలేదేమో అనుకున్నారు. కానీ సినిమాలో నవీన్ చేసిన బాల్ రెడ్డి పాత్ర బాగానే పేలింది. మరీ ఎక్కువ స్క్రీన్ టైం లేకున్నా.. ఉన్నంత సేపూ తన ప్రత్యేకతను చాటుకున్నాడు నవీన్. రాయలసీమ యాసను బాగానే అందిపుచ్చుకుని చక్కగా డైలాగులు పలికాడు. హావభావాలు కూడా బాగున్నాయి. సినిమాలో కీలక మలుపుకు ఈ పాత్రే కారణమవుతుంది. ఎన్టీఆర్‌తో ‘రాజీ’ సీన్లో.. తన పాత్ర ముగిసే సన్నవేశంలో నవీన్ తన టాలెంట్ చూపించాడు. మొత్తంగా ఈ పాత్రకు మంచి రెస్పాన్స్ వచ్చింది. నవీన్ ఏంటో జనాలకు తెలిసేలా చేసింది. ఈ సినిమా కమర్షియల్ గానూ పెద్ద సక్సెస్ అయ్యేలా ఉండటంతో ఇకనైనా తన కెరీర్ మారుతుందని నవీన్ ఆశిస్తున్నాడు.