హారర్ సిరీస్ లో ఈ సారి నయనతార?

తమిళంలో 'కాంచన' సిరీస్ తో లారెన్స్ వరుస సినిమాలు చేస్తున్నాడు. ఈ సిరీస్ లో వచ్చే ప్రతి సినిమా విజయాన్ని అందుకుంటూనే ఉంది. అలాగే దర్శకుడు సుందర్ సి. కూడా 'అరణ్మనై' సిరీస్ ను తెరకెక్కిస్తూ వస్తున్నాడు. హన్సిక - ఆండ్రియా ప్రధాన పాత్రధారులుగా చేసిన 'అరణ్మనై' .. త్రిష - హన్సిక కాంబినేషన్లో వచ్చిన 'అరణ్మనై 2' తమిళంతో పాటుగా తెలుగులోను భారీ విజయాలను అందుకున్నాయి. హారర్ కామెడీ సినిమాలలో తమ ప్రత్యేకతను చాటుకున్నాయి.

ఇక ఇప్పుడు సుందర్ .. 'అరణ్మనై 3' సినిమాను చేస్తున్నాడు. ఈ ఏడాది ద్వితీయార్ధంలో ఈ సినిమాను విడుదల చేయాలనే లోచనలో ఉన్నాడు. రాశి ఖన్నా - ఆండ్రియా ప్ర్రదానమైన పాత్రలను పోషిస్తున్న ఈ సినిమాపై అందరిలో అంచనాలు ఉన్నాయి. రెండవ భాగంలో సిద్ధార్థ్ హీరో కాగా .. మూడో భాగంలో ఆర్య చేస్తున్నాడు. ప్రత్యేక పాత్రల్లో సుందర్ .. సంపత్ రాజ్ నటిస్తుండగా, యోగిబాబు కామెడీ ఈ సినిమాకి హైలైట్ గా నిలుస్తుందని అంటున్నారు.

ఇక ఈ సినిమా చిత్రీకరణ పరంగా ముగింపు దశకి వెళుతూ ఉండగానే, 'అరణ్మనై 4' కి సంబంధించిన కథను కూడా సుందర్ సిద్ధం చేసుకున్నట్టుగా వార్తలు వస్తున్నాయి. ఈ సినిమాలో ప్రధానమైన పాత్రకిగాను నయనతార అయితేనే బాగుంటుందని సుందర్ భావిస్తున్నాడట. హారర్ థ్రిల్లర్ సినిమాల్లో నయనతార అదరగొట్టేస్తుంది. ఈ తరహా కథలను ఆమె ఒంటి చేత్తో నడిపించేస్తుంది. అందువలన ఆమెను సంప్రదించే పనిలో సుందర్ ఉన్నాడట. నయనతార ఓకే అంటే 'అరణ్మనై 4'పై అంచనాలు పెరిగినట్టే!