'నీ నవ్వే'.. 'అర్జున్ రెడ్డి' కంపోజర్ నుండి వచ్చిన అందమైన మెలోడీ..!

ఇటీవల కాలంలో రిలీజ్ కు ముందే ఆడియన్స్ దృష్టిని ఆకర్షించిన చిన్న సినిమా ఏదంటే ''ఫస్ట్ డే ఫస్ట్ షో'' అని చెప్పాలి. వెరైటీగా ప్రచార కార్యక్రమాలు చేస్తుండటం.. ప్రమోషనల్ కంటెంట్ వినోదాత్మకంగా ఉండటం వంటి అంశాలు ఈ సినిమాపై మంచి బజ్‌ ని సృష్టించాయి.

'ఫస్ట్ డే ఫస్ట్ షో' చిత్రానికి 'జాతిరత్నాలు' ఫేమ్ అనుదీప్ కేవీ కథ - స్క్రీన్ ప్లే సమకూర్చారు. అందుకే ఈ సినిమాని తన భుజాల మీద వేసుకొని ప్రమోట్ చేస్తున్నారు. రీసెంట్ గా ప్రముఖ నిర్మాత అల్లు అరవింద్‌ తో చేసిన ఫన్నీ వీడియో సోషల్ మీడియాలో ఎంతగానో వైరల్ అయింది.

పాట లేకుండానే అల్లు అరవింద్ తో రిలీజ్ చేయించి నవ్వులు పూయించారు 'ఫస్ట్ డే ఫస్ట్ షో' టీమ్. ఈ నేపథ్యంలో సినిమా నుంచి తాజాగా 'నీ నవ్వే' అనే రెండో సాంగ్ లిరికల్ వీడియోను చిత్ర బృందం విడుదల చేసింది.

'కొత్తగా ఊపిరందుకుంది ఊపిరి.. సూటిగా సాగిపొమ్మని.. ఆశగా తెల్లవారుతోంది రాతిరి.. నిండుగా రేపు నాదని.. నీ నవ్వే నీ చిరునవ్వే.. నేను కోరే వెన్నెల' అంటూ సాగిన ఈ మెలోడీ శ్రోతలను అలరిస్తోంది. హీరోయిన్ చుట్టూ తిరుగుతూ హీరో పాడుకునే ప్రేమ పాట ఇది.

'అర్జున్ రెడ్డి' 'జాతిరత్నాలు' వంటి సినిమాలకు సంగీతం సమకూర్చిన రధన్.. 'నీ నవ్వే' పాటకు అందమైన స్వరాలు సమకూర్చారు. గీత రచయిత రామజోగయ్య శాస్త్రి అర్థవంతమైన సాహిత్యం అందించగా.. సింగర్ రామ్ మిరియాల హుషారుగా ఆలపించారు. 'చిట్టి' వంటి చార్ట్ బస్టర్ తర్వాత వీరి కాంబోలో వచ్చిన పాట ఇది.

పల్లెటూరి వాతావరణంలో చిత్రీకరించబడిన ఈ పాటలో ప్రతిదీ చాలా సహజంగా కనిపిస్తుంది. ప్రధాన జంట శ్రీకాంత్ రెడ్డి - సంచితా బాషులు ఆకట్టుకున్నారు. ఇకపోతే ఈ సినిమాలో తనికెళ్ల భరణి - వెన్నెల కిషోర్ - శ్రీనివాస్ రెడ్డి - సీవీఎల్ నరసింహారావు - ప్రభాస్ శ్రీను - మహేష్ ఆచంట తదితరులు ఇతర పాత్రల్లో కనిపించనున్నారు.

'ఫస్ట్ డే ఫస్ట్ షో' చిత్రానికి వంశీధర్ గౌడ్ - లక్ష్మీనారాయణ పుట్టంశెట్టి దర్శకత్వం వహిస్తున్నారు. ఏడిద శ్రీరామ్ సమర్పణలో శ్రీజ ఎంటర్‌టైన్‌మెంట్స్ బ్యానర్ పై శ్రీజ ఏడిద ఈ చిత్రాన్ని నిర్మిస్తోంది. ప్రశాంత్ అంకిరెడ్డి సినిమాటోగ్రఫీ అందించగా.. మాధవ్ ఎడిటర్ గా వర్క్ చేసాడు. త్వరలోనే ఈ రొమాంటిక్ కామెడీ ఎంటర్టైనర్ ని ప్రేక్షకుల ముందుకు తీసుకురావడానికి మేకర్స్ సన్నాహాలు చేస్తున్నారు.