ఈ పాటలోనూ అదే చూపించిన వర్మ

వర్మ 'లక్ష్మీస్‌ ఎన్టీఆర్‌' చిత్రంలో చంద్రబాబు నాయుడును మెయిన్‌ విలన్‌ గా చూపించబోతున్నట్లుగా ఇప్పటికే అర్థం అయ్యింది. తాజాగా విడుదల చేసిన వీడియో సాంగ్‌ లో కూడా వర్మ అదే విషయాన్ని మరోసారి చెప్పకనే చెప్పాడు. పాట రిలిక్స్‌ మరియు షాట్స్‌ అన్ని కూడా చంద్రబాబు నాయుడును టార్గెట్‌ చేసే విధంగా ఉన్నాయి. పాట మొత్తం కూడా ఎన్టీఆర్‌, లక్ష్మీ పార్వతిల మద్య ఉన్న అన్యోన్యతను చూపించే ప్రయత్నం చేశాడు. అదే సమయంలో చంద్రబాబు నాయుడు వారిద్దరి మద్య సన్నిహిత్యంతో ఎంతగా రగిలి పోయాడో కూడా చూపించాడు.

ఎన్టీఆర్‌ మహానాయకుడు చిత్రంలో చంద్రబాబు నాయుడును హీరోగా చూపించే ప్రయత్నం చేస్తే వర్మ మాత్రం తన సినిమాలో పూర్తి విలన్‌ గా చూపించనున్నాడని మళ్లీ మళ్లీ వెళ్లడవుతోంది. ఎన్నికల సమయంలో ఇలాంటి సినిమాలు చంద్రబాబు నాయుడు ఇమేజ్‌ ను దెబ్బ తీయడం ఖాయం అంటూ రాజకీయ వర్గాల వారు అంచనా వేస్తున్నారు. మరో వైపు వర్మ ఈ చిత్రాన్ని ఎన్టీఆర్‌ అభిమానుల కోసం అన్నట్లుగా తీస్తుండటంతో పాటు లక్ష్మీ పార్వతిని ఏ సందర్బంలో పెళ్లి చేసుకోవాల్సి వచ్చిందనే విషయాన్ని కూడా చూపబోతున్నాడు.

అన్నగారి అభిమానుల్లో ఉన్న కొద్ది పాటి అనుమానాలను ఈ చిత్రంలో వర్మ చెరిపేయబోతున్నట్లుగా ఈ పాటలోనే అర్థం అవుతోంది. అతి త్వరలోనే ఈ చిత్రాన్ని ప్రేక్షకుల ముందుకు తీసుకు వచ్చేందుకు ఏర్పాట్లు జరుగుతున్నాయి. వర్మ ఈ చిత్రంను అత్యంత ప్రతిష్టాత్మకంగా తీసుకుని తెరకెక్కిస్తున్నాడు. ప్రస్తుతం సినిమాకు సంబంధించిన నిర్మాణానంతర కార్యక్రమాలు జరుగుతున్నట్లుగా సమాచారం అందుతోంది. త్వరలో విడుదల తేదీని ప్రకటించే అవకాశం ఉంది. వర్మ సినిమా విడుదల తర్వాత మరెంతగా సంచలనాలు సృష్టిస్తాడో చూడాలి.