శృతిని రీప్లేస్ చేసే సత్తా ఆమెకుందట

సంఘమిత్ర.. కొన్ని రోజులుగా ఈ కోలీవుడ్ సినిమా తెగ వార్తల్లో నానుంతోంది. తేనాండాల్ ఫిలిమ్స్ బ్యానర్ పై 400 కోట్ల రూపాయల బడ్జెట్ తో.. 8 వ శతాబ్దం కాలంతో ఓ జానపథ కథను తెరకెక్కిస్తామన్నారు. కేన్స్ లో ఈ మూవీ ప్రారంభం కూడా జరగగా.. ఇప్పుడు లీడ్ రోల్ చేయాల్సిన శృతి తప్పుకుంది.

ఇప్పుడీ కేరక్టర్ ను ఎవరితో రీప్లేస్ చేయాలన్నది దర్శకుడు సుందర్ సి తీసుకోవాల్సిన నిర్ణయం. భారీ బడ్జెట్ కావడంతో నేషనల్ లెవెల్ లో ఫేమ్ ఉన్న హీరోయిన్ తప్పనిసరి. లేకపోతే వర్కవుట్ కాదు. కానీ ఈ పాత్రకు కావాల్సిన అన్ని అర్హతలు ఉన్నాయంటోంది దాదాపుగా ఫేడవుట్ అయిపోయిన ఓ హీరోయిన్. నీతు చంద్ర టాలీవుడ్ జనాలకు బాగనే తెలుసు. మంచు విష్ణు మూవీ విష్ణు.. శేఖర్ కమ్ముల గోదావరి.. రాజశేఖర్ సత్యమేవ జయతే వంటి చిత్రాల్లో నటించిన నీతు చంద్ర.. 'నేను ఈ పాత్రను చేసేందుకు ఇష్టపడుతున్నాను. మార్షల్ ఆర్ట్స్.. థియేటర్ ఆర్టిస్ట్ గా ప్రావీణ్యం ఉన్న నేను.. పూర్తి అంకిత భావంతో ఈ అవకాశాన్ని ఓ గొప్ప గౌరవంగా తీసుకుంటాను' అంటూ శ్రీ తేనాండాల్ ఫిలిమ్స్ కు సోషల్ మీడియా ద్వారా తన రిక్వెస్ట్ ను పంపింది.

రెండు బ్లాక్ బెల్ట్ లు ఉన్న నీతు చంద్ర ఈ కేరక్టర్ కు సరిగ్గా సరిపోతుందనే మాట వాస్తవమే కావచ్చు కానీ.. ప్రస్తుతం ఈమె ఫామ్ లో లేదు. సింగిల్ సాంగ్ లతో కొన్నేళ్లుగా కెరీర్ నెట్టుకొస్తోంది. పైగా ఏడేళ్లుగా హిందీ జనాలకు దూరం అయిపోయింది. టాలీవుడ్ ఆడియన్స్ కు కనిపించి ఇంకో ఏడాది ఎక్కువే అయింది. దీంతో నీతును తీసుకోవడం సంఘమిత్ర మేకర్స్ రిస్క్ కావచ్చు. ఆమె అభ్యర్ధనను మన్నించే అవకాశాలు తక్కువే.

అయితే శృతి హాసన్ ను రీప్లేస్ చేయాలంటే.. అనుష్క.. నయనతార లాంటి టాప్ హీరోయిన్లకే సాధ్యం. బాహుబలి కోసం ఎంతో సమయం కేటాయించిన అనుష్క.. మళ్లీ 2-3 ఏళ్లు ఒకే ప్రాజెక్టుకు కమిట్ అయ్యే అవకాశాలు తక్కువ. ఇక నయనతార సినిమాలు చేసే స్పీడ్ కి.. ఈ ప్రాజెక్ట్ షెడ్యూల్స్ కి ఏ మాత్రం దగ్గరి పోలికలు ఉండవు. మరి సంఘమిత్ర కేరక్టర్ ఎవరికి ఆఫర్ చేస్తారనే టాపిక్ ప్రస్తుతానికి సస్పెన్స్ గానే కంటిన్యూ అవుతోంది.