పోస్టర్ సరే.. శైలజ ఏది రామయ్యా?

ఎనర్జిటిక్ హీరో రామ్ చాలా కాలం తర్వాత హిట్ కొట్టాడు. నేను.. శైలజ.. అంటూ సూపర్ హిట్ సాధించాడు. జనవరి 1నే మూవీని రిలీజ్ చేసి, తనకు టాలీవుడ్ కు హిట్ తో కొత్త ఏడాదికి స్వాగతం పలికాడు. వరుస ఫ్లాపుల తర్వాత వచ్చిన ఈ హిట్.. రామ్ కి ఊరటనిచ్చిందని చెప్పచ్చు. ఇప్పుడు నేను.. శైలజ 50 రోజులు పూర్తి చేసుకుంది.

అన్ని చోట్లా ఆడేయకపోయినా.. ఓ హిట్ సినిమాకి 50 రోజుల పోస్టర్స్ వేయడం పెద్ద విషయమేం కాదు. తమ ఆనందాన్ని పంచుకునేందుకు ఈ పోస్టర్స్ వేస్తుంటారు. అయితే.. ఈ పోస్టర్ లో హీరో రామ్ ఒక్కడే కనిపించడమే ఆశ్చర్యకరం. ఎక్కడా కనీసం హీరోయిన్ ని చూపించకుండా.. కేవలం రామ్ ని మాత్రమే పోస్టర్లలో వేయడం దారుణం అనే కామెంట్స్ వినిపిస్తున్నాయి. నిజానికి నేను.. శైలజ.. చిత్రం హిట్ అవడంలో హీరోయిన్ గా నటించిన మలయాళ కుట్టి కీర్తి సురేష్ కష్టం చాలానే ఉంది. నటనలో ఆమె ట్యాలెంట్ ఈ మూవీకి బాగా హెల్త్ అయింది. ఇంకా క్లియర్ గా చెప్పాలంటే.. చాలా సన్నివేశాల్లో హీరోని డామినేట్ చేసేసింది కీర్తి రోల్.

ఈ మూవీ తర్వాత కీర్తి సురేష్ కి ఇక్కడ కూడా బోలెడు మంది అభిమానులు ఏర్పడ్డారు. అంతగా ఆకట్టుకున్న కీర్తిని.. ఓ ప్రతిష్టాత్మకమైన పోస్టర్ లో చూపకపోవడం సరికాదనే కామెంట్స్ వినిపిస్తున్నాయి. నీకు హిట్ ఇచ్చి కీర్తి తెచ్చిపెట్టిన శైలజ ఎక్కడ రామయ్యా అంటూ హీరోకి క్వశ్చన్స్ వస్తున్నాయి. మరి వీటికి రామ్ ఏం సమాధానం ఇస్తాడో ?