నేను శైలజ.. ఫైనల్ గా ఎంతంటే..?

ఎడారిలో గుక్కెడు మంచి నీళ్ల కోసం చూస్తుంటే.. ఒయాసిస్సు కనిపిస్తే ఎలా ఉంటుంది? ఎనర్జిటిక్ హీరో రామ్ కు ‘నేను శైలజ’ సినిమా అలాగే తగిలింది. యావరేజ్ మూవీ కూడా కష్టమైపోతున్న టైంలో ఈ సినిమా సూపర్ హిట్టయి రామ్ కెరీర్ కు మళ్లీ ఊపిరి పోసింది. పెద్దగా అంచనాల్లేకుండా విడుదలైన ‘నేను శైలజ’ మంచి టాక్ తెచ్చుకుని సూపర్ హిట్ రేంజిని అందుకుంది. ఈ ఏడాది టాలీవుడ్‌ కు శుభారంభాన్నందించిన సినిమా ఇది. ఎందుకంటే ప్రేమంట - మసాలా - శివమ్ లాంటి డిజాస్టర్లతో దారుణంగా దెబ్బ తిన్న ‘స్రవంతి’ మూవీస్ కు సైతం ఈ సినిమా అత్యావశ్యకమైన విజయాన్నందించింది. గత చేదు అనుభవాల నేపథ్యంలో ఈ సినిమాకు పది కోట్ల లోపే బడ్జెట్ పెట్టారు రవికిషోర్.

ఐతే ఈ సినిమా ఆయనకు పాతిక కోట్ల దాకా ఆదాయం తెచ్చిపెట్టినట్లు సమాచారం. ఫుల్ రన్ లో ఈ సినిమా రూ.40.1 కోట్ల గ్రాస్ కలెక్ట్ చేయడం విశేషం. ఇందులో షేర్ రూ.20.7 కోట్లు వచ్చింది. ఒక్క నైజాం ఏరియాలోనే రూ.7.1 కోట్ల షేర్ కలెక్ట్ చేయడం విశేషం. ఇక్కడ గ్రాస్ వసూళ్లు రూ.14.5 కోట్లుగా ఉన్నాయి. సీడెడ్ (రాయలసీమ)లో రూ.2.48 కోట్ల షేర్, రూ.4.25 కోట్ల గ్రాస్ వసూలైంది. ఆంధ్రా ప్రాంతంలో అన్ని జిల్లాలూ కలిపి రూ.7.2 కోట్ల షేర్ కలెక్టైంది. కర్ణాటకలో రూ.1.52 కోట్లు, అమెరికాలో రూ.2.15 కోట్లు.. ఇలా మొత్తంగా షేర్ రూ.20.7 కోట్లుగా తేలింది. ‘రెడీ’ తర్వాత రామ్ కెరీర్లో ఇవే హైయెస్ట్ కలెక్షన్లు. స్రవంతి రవికిషోర్ ఇంకా ‘నేను శైలజ’ శాటిలైట్ రైట్స్ కూడా అమ్మలేదు. అలాగే రీమేక్ హక్కులకూ మంచి డిమాండే ఉందట. కాబట్టి ఆయనకు రూ.25 కోట్ల కంటే ఎక్కువే వర్కవుటయ్యేలా ఉంది.