'బాహుబలి'పై నెట్ ఫ్లిక్స్ ఫన్నీ మీమ్ .. 'ఆర్ ఆర్ ఆర్' రిప్లై!

'బాహుబలి' సినిమా ప్రేక్షకుల ముందుకు వచ్చి చాలా కాలమే అయింది. అయినా ఆ సినిమాను ఇంకా ఎవరూ మరిచిపోలేదు. తెలుగు సినిమా చరిత్ర కూడా 'బాహుబలి'కి ముందు .. ఆ తరువాత అన్నట్టుగా మారిపోయింది.

ఇప్పటికీ పోరాటం నేపథ్యంలో ఏ సినిమా వచ్చినా 'బాహుబలి'తోనే పోల్చుతున్నారు. ఈ సినిమాలోని పాత్రల పేర్లను .. వాటి లుక్స్ పిల్లలకి కూడా బలంగా గుర్తుండిపోయాయి. అమరేంద్ర బాహుబలిని కట్టప్ప ఎందుకు పొడిచాడు? అనేది అప్పట్లో అన్ని చోట్ల చర్చనీయాంశమైపోయింది.

అలాంటి బాహుబలి నుంచి నెట్ ఫ్లిక్స్ వారు వదిలిన ఒక ఫన్నీ మీమ్ ఇప్పుడు సోషల్ మీడియాలో వైరల్ అవుతోంది. 'బాహుబలి 2'లో ఒక సన్నివేశానికి సంబంధించిన స్టిల్ అది. అమరేంద్ర బాహుబలికి మించిన వీరుడు ఈ లోకాన లేడు అని కట్టప్ప చెప్పే డైలాగ్ ను ఈ స్టిల్ పై రాసుకొచ్చారు.

'ఇంత హైప్ ఇచ్చి చివరికి పొడిచిపారేశాడే' అనే డైలాగ్ ను సరదాగా ఆ స్టిల్ కి జోడించారు. అందుకు 'ఆర్ ఆర్ ఆర్' టీమ్ నవ్వుతూ రిప్లై ఇచ్చింది. 'ఆర్ ఆర్ ఆర్' సినిమా ప్రమోషన్స్ నడుస్తున్న వేళ బయటికి వచ్చిన ఈ ఫన్నీ మీమ్ చూసి అంతా నవ్వుకుంటున్నారు.

ఎప్పుడైనా యుద్ధమనేది మంచితనానికీ .. వచనకి మధ్యనే జరుగుతుంది. ఇదే విషయాన్ని 'బాహుబలి' మన కళ్లకు కడుతుంది. ఇక వంచనను ఎదిరించడానికి కలిసి పోరాడే ఉడుకు నెత్తురును 'ఆర్ ఆర్ ఆర్' ఆవిష్కరిస్తుంది.

ఈ రోజు నుంచే ఈ సినిమా ప్రమోషన్స్ మరింత జోరుగా కొనసాగించడానికి రంగంలోకి దిగారు. ఈ నెల 22వ తేదీ వరకూ ఆయా ప్రాంతాల్లో ముందుగా ప్లాన్ చేసిన ప్రమోషన్స్ లో ఈ సినిమా టీమ్ పాల్గొంటుంది. ఈ నెల 23వ తేదీన తిరిగి హైదరాబాద్ రానున్నారు. ప్రమోషన్స్ అన్నీ పూర్తయిన తరువాత తనకి టెన్షన్ మొదలవుతుందనే విషయాన్ని రాజమౌళి చెప్పిన సంగతి తెలిసిందే.

ఇక ఈ సినిమా తాను అనుకున్న రేంజ్ లో అఖండ విజయాన్ని సాధిస్తే, నాటు నాటు స్టెప్పులు స్టేజ్ పై వేస్తానని ఎన్టీఆర్ కి ఒక ఇంటర్వ్యూలో రాజమౌళి మాట ఇచ్చాడు. అనిల్ రావిపూడి చేసిన ఇంటర్వ్యూలో మాటల సందర్భంలో ఎన్టీఆర్ కి ఆయన ఈ విషయంలో హామీ ఇచ్చేశాడు.

దాంతో ఈ సినిమా హిట్ కావడం ఖాయం .. ఇక రాజమౌళి నాటు .. నాటు స్టెప్పులు ఎలా వేస్తాడో చూడాలనే ఆసక్తితో అభిమానులు ఉన్నారు. ప్రపంచవ్యాప్తంగా విరుచుకు పడనున్న ఈ సినిమాతో, ఎన్టీఆర్ .. చరణ్ లు పాన్ ఇండియా పట్టాదారులైపోవడం ఖాయమనే చెప్పుకుంటున్నారు.