మార్వ‌ల్ `బ్లాక్ విడో` నేష‌న‌ల్ సూప‌ర్ హీరో డే గిఫ్ట్

ప్ర‌పంచ‌వ్యాప్తంగా కొన‌సాగుతున్న మ‌హ‌మ్మారీ సినిమాల రిలీజ్ ల‌పై అస్ప‌ష్ఠ‌త‌కు కార‌ణ‌మ‌వుతున్న సంగ‌తి తెలిసిందే. అయితే ఓవైపు మ‌హ‌మ్మారీ కొన‌సాగుతున్నా.. క్రేజీ యాక్ష‌న్ అడ్వెంచ‌ర్ మూవీ బ్లాక్ విడో రిలీజ్ తేదీని ప్ర‌క‌టించారు. ప్ర‌పంచంలోనే నంబ‌ర్ వ‌న్ పారితోషికం అందుకునే నాయిక‌ స్కార్లెట్ జోహన్సన్ ఈ చిత్రంలో టైటిల్ పాత్ర‌ను పోషించారు. బ్లాక్ విడోలో నటాషా రోమనోఫ్ (కామిక్ బుక్ పాత్ర పేరు ఇది) తిరిగి రంగ ప్ర‌వేశం చేస్తుండ‌డం ఆస‌క్తిక‌రం.

మొదటి మహిళా అవెంజర్ నటాషా రోమనోఫ్ అమెరిక‌న్ కామిక్ బుక్ క‌థానాయిక‌గా పాపుల‌ర్.. ఈ పాత్ర‌కు విజువ‌ల్ రూపం బ్లాక్ విడో .. స్కార్లెట్ పోషించిన ఈ పాత్ర పూర్తి యాక్ష‌న్ ప్యాక్డ్ స‌న్నివేశాల‌తో డిజైన్ చేసారు దర్శ‌కులు. అవెంజ‌ర్స్ రేంజ్ విజువ‌ల్ ట్రీట్ ఇంత‌కుముందు రిలీజ్ చేసిన ట్రైల‌ర్ లో క‌నిపించింది. బ్లాక్ విడో చిత్రం జూలై 9 న థియేటర్లలో విడుదల కానుంది. ప్ర‌ఖ్యాత‌ మార్వెల్ అభిమానులు ఈ క్షణం కోసం ఏడాది పైగా వేచి చూస్తున్నారు. కరోనావైరస్ మహమ్మారి నేపథ్యంలో ఈ చిత్రాన్ని ప‌లుమార్లు వాయిదా వేసారు. అయితే ఈ జూలైలో ఎట్ట‌కేల‌కు రిలీజ‌వుతోంది.

బ్లాక్ విడో మార్వెల్ సినిమాటిక్ యూనివర్స్ నాలుగవ దశలో మొదటి చిత్రం. ఈ చిత్రానికి కేట్ షార్ట్ ల్యాండ్ దర్శకత్వం వహించారు. కెవిన్ ఫీజ్ నిర్మించారు. నటాషా రోమనోఫ్ అకా బ్లాక్ విడో గ‌తం ఏమిటి? గ‌త‌ సంబంధాలతో ముడిప‌డిన ప్రమాదాలేమిటి.. ? ఇందులో ఆ రెండో శ‌క్తి ఎవ‌రు? నటాషా గూఢ‌చ‌ర్యం వెన‌క క‌థేమిటి? ఇవ‌న్నీ తెర‌పై చూడాల్సిందే. న‌టాషా (స్కార్లెట్) అవెంజర్ కావడానికి చాలా కాలం ముందు ఆమె రిలేష‌న్స్ గురించి తెర‌పై ఆవిష్క‌రిస్తున్నారు. తాజాగా నేష‌న‌ల్ సూప‌ర్ హీరో డే గిఫ్ట్ అంటూ రిలీజ్ చేసిన యాక్ష‌న్ విజువ‌ల్స్ ఆక‌ట్టుకుంటున్నాయి. స్కార్లెట్ జోహన్సన్ ఈ చిత్రంలో నటాషా ( బ్లాక్ విడో) పాత్రలో తిరిగి నటించగా,.. ఫ్లోరెన్స్ పగ్ యెలెనాగా నటించింది. డేవిడ్ హార్బర్ అలెక్సీ .. ది రెడ్ గార్డియన్ పాత్రను.. రాచెల్ వీజ్ మెలినా పాత్రను పోషిస్తున్నారు.

గత నెలలో వాల్ట్ డిస్నీ అధికారిక షో హ్యాండిల్ బ్లాక్ విడో ని థియేట‌ర్ల‌లో అలాగే డిస్నీ + లో విడుదల చేయనున్నట్లు ప్రకటించింది. ఈ చిత్రం జూలై 9 న థియేటర్లలో ప్రదర్శించ‌నున్నారు.