మరో పోరాటానికి ఎన్టీఆర్ సిద్ధం

‘టెంపర్’ నుంచి ఆరు వరుస హిట్లను ఖాతాలో వేసుకుని ఫుల్ జోష్‌ మీద ఉన్నాడు నందమూరి చిన్నోడు యంగ్ టైగర్ జూనియర్ ఎన్టీఆర్. దీనికితోడు ఆస్కార్ రేసులో నిలిచి అంతర్జాతీయ ఖ్యాతిని గడించాడు. ఈ ఉత్సాహంతోనే అతడు ఇప్పుడు టాలీవుడ్ బడా డైరెక్టర్ కొరటాల శివతో తన 30వ సినిమాను చేస్తోన్నాడు. ఇటీవలే పట్టాలెక్కిన ఈ మూవీ షూటింగ్ శరవేగంగా సాగుతోంది.

ఎన్టీఆర్ హీరోగా కొరటాల శివ తెరకెక్కించే మూవీకి సంబంధించిన రెగ్యూలర్ షూటింగ్ మార్చిలోనే మొదలైంది. ఇందులో భాగంగానే ఫస్ట్ షెడ్యూల్‌ను హైదరాబాద్ శివారు ప్రాంతంలోని శంకరపల్లిలో షూట్ చేశారు. ఆ తర్వాత రామోజీ ఫిల్మ్ సిటీలో మరో దాన్ని కూడా కంప్లీట్ చేశారు. వీటిలో భారీ యాక్షన్ సీక్వెన్స్‌తో పాటు కొన్ని కీలకమైన సన్నివేశాలను షూట్ చేసుకున్నారు.

పాన్ ఇండియా రేంజ్‌లో ఎంతో ప్రతిష్టాత్మకంగా రాబోతున్న ఈ సినిమా షూటింగ్‌ను వీలైనంత త్వరగా పూర్తి చేసి వచ్చే ఏడాది ఏప్రిల్ 5వ తేదీన రిలీజ్ చేయాలని భావిస్తున్నారు. అందుకు అనుగుణంగానే ఏమాత్రం బ్రేకులు లేకుండా షూట్ జరపాలనుకుంటోన్నారు. ఇందులో భాగంగానే ఈ సినిమా కొత్త షెడ్యూల్‌ను వచ్చే వారం నుంచి ప్రారంభించాలని ప్లాన్ చేసుకున్నారు.

తాజా సమాచారం ప్రకారం.. ఎన్టీఆర్ - కొరటాల సినిమాకు సంబంధించిన కొత్త షెడ్యూల్‌ను హైదరాబాద్‌లో వచ్చే వారం నుంచి ప్రారంభించబోతున్నారు. పది రోజుల పాటు జరగనున్న ఇందులో ఎన్టీఆర్‌పై మేజర్ యాక్షన్ సీక్వెన్స్‌లను షూట్ చేస్తారని తెలిసింది. దీనికోసం ప్రముఖ స్టూడియోలో ఓ సెట్‌ను కూడా నిర్మిస్తున్నారు. ఈ పనులు ప్రస్తుతం దాదాపుగా పూర్తి అయ్యాయని టాక్.

ఈ షూట్ తర్వాత వచ్చే నెలలో ఈ సినిమా నాలుగో షెడ్యూల్‌ను కూడా జరిపేలా ప్లాన్ చేశారని అంటున్నారు. ఇందులో ఎక్కువగా బ్లూ మ్యాట్ సీన్స్‌ ఉంటాయనే టాక్ వినిపిస్తోంది. మొత్తంగా వచ్చే వారం నుంచి ఎన్టీఆర్ మరోసారి వేటను మొదలు పెట్టబోతున్నాడు. ఇదిలా ఉండగా.. తారక్ మే 20వ తేదీన పుట్టినరోజు జరుపుకుంటోన్నాడు. దీన్ని పురస్కరించుకుని ఈ సినిమా నుంచి టైటిల్‌తో కూడిన మోషన్ పోస్టర్‌ను విడుదల చేస్తారని ప్రచారం జరుగుతోంది.