'లబ్‌ డబ్‌ లబ్‌ డబ్ డబ్బూ'.. పైసాయే పరమాత్మ అంటున్న కోబ్రోస్..!

అనిల్ రావిపూడి దర్శకత్వంలో సూపర్ హిట్ 'ఎఫ్ 2' ప్రాంచైజీలో తెరకెక్కిన తాజా చిత్రం ''ఎఫ్3''. ఇందులో విక్టరీ వెంకటేష్ - మెగా ప్రిన్స్ వరుణ్ తేజ్ హీరోలుగా నటించగా.. తమన్నా భాటియా - మెహ్రీన్ కౌర్ హీరోయిన్లుగా సందడి చేయనున్నారు. 2022 సమ్మర్ సీజన్ లో ఏప్రిల్ 28న ఈ చిత్రాన్ని గ్రాండ్ గా విడుదల చేయనున్నారు. ఈ నేపథ్యంలో మూవీ ప్రమోషన్స్ ముమ్మరం చేసిన మేకర్స్.. తాజాగా 'లబ్‌ డబ్‌ లబ్‌ డబ్ డబ్బూ' అనే ఫస్ట్ సింగిల్ ను రిలీజ్ చేసారు.

'ఎఫ్ 3' సినిమా నుంచి ఇప్పటికే విడుదలైన ప్రచార చిత్రాలు మంచి స్పందన తెచ్చుకున్నాయి. ఆదివారం వదిలిన 'లబ్‌ డబ్‌ లబ్‌ డబ్ డబ్బు' పాట ప్రోమో సైతం ఆకట్టుకుంది. ఇప్పుడు రిలీజ్ అయిన పూర్తి సాంగ్ కూడా ప్రేక్షకులను అలరిస్తోంది. 'పాకెట్ లోన పైసా ఉంటే ప్రపంచమే పిల్లి అవుతుంది.. పులై మనం బ్రతికేయొచ్చు విశ్వదాభిరామా.. వాలెట్ లోన సొమ్మే ఉంటే పాకెట్ లోకి వరల్డ్ వచ్చి సలాం కొట్టు మామా.. వినరా వేమా..' అంటూ సాగిన ఈ పాట డబ్బు గురించి వివరిస్తోంది.

పైసా చుట్టూ తిరిగే ఫన్ అండ్ ఫస్ట్రేషన్ కథతో ఈ సినిమా రెడీ అవుతోందని మేకర్స్ మొదటి నుంచీ చెబుతూనే ఉన్నారు. ఇప్పుడు లేటెస్టుగా వచ్చిన 'లబ్‌ డబ్‌ లబ్‌ డబ్' సాంగ్ కూడా డబ్బుకి అంతం లేదనే సత్యాన్ని తెలియజేస్తోంది. ఇందులో వెంకటేష్ - వరుణ్ తేజ్ వేసిన స్టెప్పులు అలరిస్తున్నాయి. భాను మాస్టర్ డ్యాన్స్ కొరియోగ్రఫీ చేసిన ఈ పాటలో సునీల్ కూడా కనిపించారు. రాక్ స్టార్ దేవిశ్రీ ప్రసాద్ ట్యూన్ సమకూర్చగా.. చౌరస్తా రామ్ మిరియాల తనదైన శైలిలో హుషారుగా ఆలపించారు. లిరిసిస్ట్ భాస్కర్ భట్ల సినిమా నేపథ్యానికి తగ్గట్లుగా సాహిత్యం రాశారు.

'ఎఫ్ 3' చిత్రాన్ని దిల్ రాజు సమర్పణలో శ్రీ వెంకటేశ్వర క్రియేషన్స్ బ్యానర్ పై శిరీష్ నిర్మించారు. దీనికి హర్షిత్ రెడ్డి సహ నిర్మాత. సాయి శ్రీరామ్ సినిమాటోగ్రాఫర్ గా.. ఏఎస్ ప్రకాష్ ఆర్ట్ డైరెక్టర్ గా వర్క్ చేసారు. తమ్మిరాజు ఎడిటింగ్ బాధ్యతలు నిర్వహిస్తున్నారు. ఈ సినిమాలో వెంకటేష్ రేచీకటి బాధితుడిగా.. వరుణ్ తేజ్ నత్తిగా మాట్లాడే యువకుడిగా కనిపించనున్నారు. సోనాలి చౌహన్ ప్రత్యేక పాత్ర పోషిస్తుండగా.. రాజేంద్ర ప్రసాద్ - వెన్నెల కిషోర్ - మురళీ శర్మ - రఘుబాబు - శ్రీకాంత్ అయ్యంగార్ - పృథ్వీరాజ్ తదితరులు ఇతర పాత్రల్లో కనిపించనున్నారు.