న్యూ ఇయర్ కూడా మనదే..!

నేచురల్ స్టార్ నాని హీరోగా రాహుల్ సాంకృత్యన్ దర్శకత్వంలో తెరకెక్కిన తాజా చిత్రం ''శ్యామ్ సింగ రాయ్''. ఇందులో నాని రెండు పాత్రల్లో కనిపించగా.. సాయి పల్లవి - కృతి శెట్టి - మడోన్నా సెబాస్టియన్ హీరోయిన్లుగా నటించారు. క్రిస్మస్ సందర్భంగా డిసెంబర్ 24న తెలుగు తమిళ కన్నడ మలయాళ భాషల్లో విడుదలైన ఈ సినిమా విజయవంతంగా ప్రదర్శించబడుతోంది. ఈ నేపథ్యంలో చిత్ర బృందం సోమవారం హైదరాబాద్‌ లో సక్సెస్ మీట్ ఏర్పాటు చేశారు.

ఈ సందర్భంగా నాని మాట్లాడుతూ.. ''ఎవరూ సినిమా బాగుందని ఒకటి రెండు లైన్లలో చెప్పడం లేదు. ఆల్మోస్ట్ ఒక లవ్ లెటర్‌ లా రాస్తున్నారు. అదే మాకు పెద్ద సక్సెస్ అనిపిస్తోంది. ఎలాంటి పరిస్థితులు ఉన్నా మంచి చిత్రాలను ఆదరిస్తామని ప్రేక్షకులు ప్రతిసారీ నిరూపిస్తూనే ఉన్నారు. మీ ప్రోత్సాహం ఉన్నంత వరకు మీకు మంచి సినిమాలు ఇచ్చేందుకు ప్రాణం పెట్టి పని చేస్తాం. వరుస విజయాలతో ఈ నెల అంతా బాగుంది. అన్ని పరిస్థితులు చక్కబడి ఈ ఊపు ఇలాగే మరో పదేళ్లు కొనసాగాలని మనస్ఫూర్తిగా కోరుకుంటున్నా'' అని అన్నారు.

''శ్యామ్ సింగ రాయ్ బేసిక్ ఐడియాలో చాలా బలం ఉండాలి. అలాంటి కథను అందించిన సత్యదేవ్ గారికి థ్యాంక్స్. మీరు ఇలాంటి సమయం కోసం ఎన్నేళ్ల నుంచి ఎదురుచూస్తున్నారో నాకు తెలుసు. ఈ సినిమాతో అది నిజమైనందుకు సంతోషంగా ఉంది. నాకు ‘సఖి’ లాంటి ఎప్పటికీ నిలిచిపోయే క్లాసిక్ లవ్‌ స్టోరీ చేయాలనే కోరిక ఉండేది. ఇప్పుడు ఈ చిత్రంతో ఆ కోరిక తీరింది. టీం అందరికీ.. తెలుగు ప్రేక్షకులందరికీ కృతజ్ఞతలు. ఈ న్యూ ఇయర్ కూడా మనదే'' అని నాని ధీమా వ్యక్తం చేశారు.

కాగా, 'శ్యామ్ సింగరాయ్' చిత్రాన్ని నిహారిక ఎంటర్టైన్మెంట్స్ బ్యానర్ పై వెంకట్ బోయనపల్లి నిర్మించారు. ఇందులో రాహుల్ రవీంద్రన్ - మురళీ శర్మ - అభినవ్ గోమటం - జిషు సేన్ గుప్తా - లీలా శాంసన్ - మనీష్ వాద్వా - బరున్ చందా కీలక పాత్రలు పోషించారు. మిక్కీ జె మేయర్ ఈ చిత్రానికి సంగీతం సమకూర్చారు. సాను జాన్ వర్గేష్ సినిమాటోగ్రఫీ అందించగా.. అవినాష్ కొల్లా ప్రొడక్షన్ డిజైనింగ్ చేశారు. నవీన్ నూలి ఎడిటింగ్ వర్క్ చేశారు.