ఉగాదికి సరికొత్త అప్డేట్ తో వచ్చిన స్వాతిముత్యం..!

ప్రముఖ నిర్మాత బెల్లంకొండ సురేష్ రెండో తనయుడు.. యువ హీరో సాయి శ్రీనివాస్ తమ్ముడు బెల్లంకొండ గణేష్ హీరోగా ఇంట్రడ్యూస్ అవుతున్న సంగతి తెలిసిందే. సితార ఎంటర్టైన్మెంట్స్ బ్యానర్ లో రూపొందే ''స్వాతిముత్యం'' అనే సినిమాతో అరంగేట్రం చేస్తున్నాడు చిన్న బెల్లంకొండ.

'స్వాతిముత్యం' చిత్రంతో లక్ష్మణ్ కె కృష్ణ దర్శకుడిగా ఇండస్ట్రీకి పరిచయం అవుతున్నారు. ఇందులో గణేష్ సరసన వర్ష బొల్లమ్మ హీరోయిన్ గా నటిస్తోంది. ఇప్పటికే ఈ సినిమా నుంచి వచ్చిన ఫస్ట్ లుక్ - గ్లిమ్స్ మంచి స్పందన తెచ్చుకున్నాయి. నేడు ఉగాది పండుగ సందర్భంగా మేకర్స్ సరికొత్త పోస్టర్ తోపాటుగా విడుదలకు సంబంధించిన అప్డేట్ అందించారు.

ప్రేక్షకులను ఎంటర్టైన్ చేయడానికి 'స్వాతిముత్యం' సినిమా ఈ జూలైలో థియేటర్లలోకి రాబోతున్నట్లు ప్రకటించారు. ఈ సందర్భంగా ఉగాది శుభాకాంక్షలు తెలుపుతూ గణేష్ - వర్షా చిరునవ్వులు చిందిస్తున్న ఓ పోస్టర్ ను చిత్ర యూనిట్ వదిలారు.

జీవితం - ప్రేమ - పెళ్లి వంటివాటిపై యువత ఆలోచనలు, అభిప్రాయాలు ఎలా ఉన్నాయి? వాటి మధ్య స్వాతిముత్యం లాంటి యువకుడి జీవిత ప్రయాణం ఎలా సాగిందన్నది ఈ చిత్ర కథాంశం. కుటుంబ సంబంధాలు - భావోద్వేగాలు - వినోదం కలబోసి అన్ని వర్గాల ప్రేక్షకుల్ని అలరించేలా ఈ సినిమాని రూపొందిస్తున్నట్లు చిత్ర బృందం చెబుతోంది.

'స్వాతి ముత్యం'లో బాల మురళి పాత్రలో బెల్లంకొండ గణేష్ నటిస్తుండగా.. భాగ్యలక్ష్మి పాత్రలో వర్ష బొల్లమ్మ కనిపించనుంది. సీనియర్ నటుడు నరేష్ వీకే - రావు రమేష్ - సుబ్బరాజు - వెన్నెల కిషోర్ - సునయన - దివ్య శ్రీపాద తదితరులు ఇతర పాత్రలు పోషిస్తున్నారు.

పీడీవీ ప్రసాద్ సమర్పిస్తున్న ఈ చిత్రాన్ని సూర్యదేవర నాగవంశీ నిర్మిస్తున్నారు. మహతి స్వర సాగర్ సంగీతం సమకూరుస్తున్నారు. సూర్య సినిమాటోగ్రఫీ అందిస్తుండగా.. నవీన్ నూలి ఎడిటింగ్ బాధ్యతలు నిర్వహిస్తున్నారు. అవినాష్ కొల్లా ఆర్ట్ డైరెక్టర్ గా వర్క్ చేస్తున్నారు. 'స్వాతిముత్యం' రిలీజ్ డేట్ ను మేకర్స్ త్వరలోనే వెల్లడించనున్నారు.