జక్కన్న విషయంలో మహేష్ ఫ్యాన్స్ లో ఉన్న భయాలేంటి..??

ప్రస్తుతం ఇండియాలో మోస్ట్ వాంటెడ్ ఫిలిం డైరెక్టర్ ఎవరంటే ఎస్ఎస్ రాజమౌళి అని ఠక్కున చెప్పొచ్చు. ఆయనకున్న క్రేజ్ తో సరైన సినిమా పడితే ఆ హీరో రేంజ్ ఒక్కసారిగా మారిపోతుంది. మార్కెట్ మరింతగా విస్తరిస్తుంది. అందుకే భాషతో సంబంధం లేకుండా ప్రతీ ఒక్క హీరో జక్కన్నతో ఓ సినిమా పడాలని కోరుకుంటారు.

ఇప్పుడు 'ఆర్.ఆర్.ఆర్' సినిమాతో బాక్సాఫీస్ వద్ద సెన్సేషన్ క్రియేట్ చేసిన బాహుబలి దర్శకుడు.. సూపర్ స్టార్ మహేష్ బాబుతో తన తదుపరి సినిమా చేయనున్నారు. దశాబ్ద కాలానికి పైగా ఎదురు చూస్తున్న ఈ డ్రీమ్ కాంబినేషన్ కు రంగం సిద్ధమవుతోంది.

RRR బాధ్యతలు ముగియడంతో ఇప్పుడు రాజమౌళి.. మహేష్ సినిమాపై ఫోకస్ పెట్టబోతున్నారు. ఇప్పటికే రచయిత కేవీ విజయేంద్ర ప్రసాద్ కొన్ని ఆసక్తికరమైన స్టోరీ లైన్స్ రెడీ చేసి పెట్టారు. ఈ క్రేజీ ప్రాజెక్ట్ సెట్స్ మీదకు రావడానికి కాస్త సమయం పట్టొచ్చు. ఆలోపు 'సర్కారు వారి పాట' తోపాటు త్రివిక్రమ్ సినిమాను మహేష్ పూర్తి చేయనున్నాడు.

జక్కన్నతో మహేష్ బాబు సినిమా చేస్తున్నందుకు ఫ్యాన్స్ ఫుల్ ఖుషీ అవుతున్నారు. అదే సమయంలో పలు అంశాలు వారిని కలవరపడేలా చేస్తున్నాయి. దర్శకధీరుడితో సినిమా అంటే అంత ఈజీ పని కాదు. శారీరకంగా మానసికంగా ఎంతో కష్టపడాల్సి ఉంటుంది.

ప్రతీ సీన్ పర్ఫెక్ట్ రావాలని తపించే జక్కన్న.. దీని కోసం హీరోలతో ఎంతో హార్డ్ వర్క్ చేయిస్తుంటారు. భారీ వర్కౌట్స్ చేసి ఫిజిక్ మెయింటైన్ చేయాల్సి ఉంటుంది.. సరికొత్తగా మేకోవర్ అవ్వాల్సి ఉంటుంది.. సినిమా సెట్స్ మీదకు వెళ్లకముందే దీని కోసం ఎంతో ప్రిపేర్ అవ్వాల్సి ఉంటుంది.

అంతేకాదు మరో సినిమా చేసే ఆలోచన మర్చిపోయి.. పూర్తిగా రాజమౌళికే అంకితం కావాల్సి ఉంటుంది. 'బాహుబలి' కోసం ప్రభాస్ ఐదేళ్లు కష్టపడితే.. ఇప్పుడు 'ఆర్.ఆర్.ఆర్' సినిమా కోసం ఎన్టీఆర్ - రామ్ చరణ్ లు మూడేళ్ళకు పైగానే కష్టపడ్డారు. అందుకే దానికి తగ్గ ఫలితాలను అందుకున్నారు.

అయితే మహేష్ బాబు విషయానికొస్తే.. ఇప్పటి వరకు రాజమౌళి పని చేసిన హీరోల కంటే కాస్త భిన్నంగా కనిపిస్తారు. తన కంఫర్ట్ లోనే సినిమాలు చేస్తూ వచ్చారు. లుక్స్ - గెటప్స్ పరంగా పెద్దగా వెరీయేషన్ చూపించలేదు. దర్శకులు కూడా శారీరకంగా మహేష్ ను పెద్దగా కష్టపెట్టరనే టాక్ ఉంది.

కానీ ఇప్పుడు జక్కన్న విషయంలో మహేష్ కాస్త ఎక్కువగానే కష్టపడాల్సి ఉంటుంది. అందులోనూ ఇది ఫారెస్ట్ బ్యాక్ డ్రాప్ లో అడ్వెంచర్ థ్రిల్లర్ అని అంటున్నారు. కాబట్టి ఇంకాస్త ఎక్కువ హార్డ్ వర్క్ చేయాలి. అంతేకాదు సరికొత్త అవతార్ లో కనిపించాల్సి ఉంటుంది.

కాకపోతే డూప్ లేకుండానే మహేష్ రిస్కీ స్టంట్స్ చేస్తుంటారు. రాజమౌళి సినిమాల్లో అలాంటి సీన్స్ స్పెషల్ గా నిలుస్తుంటాయి. కాబట్టి వీరిద్దరి కాంబోలో యాక్షన్ సన్నివేశాలు అద్భుతంగా వచ్చే అవకాశాలు ఉన్నాయి.

ఇక రాజమౌళితో సినిమా అంటే ఎప్పుడు స్టార్ట్ అవుతుందో ఎప్పుడు కంప్లీట్ అవుతుందో.. రిలీజ్ ఎప్పుడు.. వంటి విషయాలు మర్చిపోవాలి. ఇతర కమిట్మెంట్లు పెట్టుకోకుండా సుదీర్ఘ కాలం ఒక సినిమా కోసమే పని చెయాలి.

మహేష్ బాబు అయినా సరే మరో సినిమా చేయడానికి చాలా సమయమే పట్టొచ్చు. అభిమానులు తమ హీరోని తెర మీద చూసుకోవడానికి కళ్ళు కాయలు కాసేలా వేచి చూడాలి. ఇలా జక్కన్న ప్రాజెక్ట్ విషయంలో సూపర్ స్టార్ ఫ్యాన్స్ లో ఇలాంటి భయాలు ఎన్నో ఉన్నాయని తెలుస్తోంది.