సమంతకు మరో బాలీవుడ్ భారీ ఆఫ‌ర్?

ఒక్కో అడుగు తెలివిగా వేస్తూ స్కై ఈజ్ లిమిట్ అన్న చందంగా కెరీర్ ని ప్లాన్ చేస్తోంది స‌మంత రూత్ ప్ర‌భు. కొన్ని వ్య‌క్తిగ‌త ఒడిదుడుకుల అనంత‌రం సామ్ ప్ర‌ణాళిక అంద‌రినీ ఆశ్చ‌ర్య‌ప‌రుస్తోంది. కెరీర్ పై త‌న ఫోక‌స్ యాటిట్యూడ్ ప్ర‌తిదీ అభిమానుల్లో హాట్ టాపిక్ గా మారింది. ఇటీవ‌ల కొంత‌కాలంగా సమంత వ‌రుస‌గా క‌థ‌లు వింటూ న‌చ్చిన ద‌ర్శ‌కుల‌కు సంత‌కాలు చేసే పనిలో పడింది. ఇటీవ‌ల కొన్ని కొత్త ప్రాజెక్టులను ప్రకటించిన సంగ‌తి తెలిసిన‌దే. తాజాగా సమంత మరో బాలీవుడ్ ప్రాజెక్ట్ పై సంతకం చేసిందని సమాచారం.

బాలీవుడ్ సూపర్ స్టార్ అక్షయ్ కుమార్ స‌ర‌స‌న సామ్ జాక్ పాట్ అందుకుంది. ఈ భారీ ప్రాజెక్ట్ లో హీరోయిన్ గా నటించడానికి సమంత అంగీకరించినట్లు తెలుస్తోంది. కుమార్ మంగత్ ఈ ప్రాజెక్ట్ కి దర్శకత్వం వహిస్తార‌ని తెలిసింది. నటీనటులు ఇత‌ర‌ సిబ్బందిపై త్వరలో అధికారిక ప్రకటన వెలువడనుంది.

అమెజాన్ బ్లాక్ బస్టర్ సిరీస్ ది ఫ్యామిలీ మ్యాన్ 2 లో కనిపించిన సమంత ఇప్పటికే హిందీ ప్రేక్షకుల్లో అసాధార‌ణ పాపులారిటీని ద‌క్కించుకుంది. సౌత్ నుంచి ఇటీవ‌లి కాలంలో ఉత్త‌రాదికి ప‌రిచ‌య‌మైన గొప్ప ప్ర‌తిభావ‌నిగా పేరు తెచ్చుకుంది. ఇప్పుడు త‌న స్టార్ డ‌మ్ ని పాన్ ఇండియా రేంజుకు విస్త‌రించే ప‌నిలో ఉంది.

త‌దుప‌రి వ‌రుస‌గా బాలీవుడ్ సినిమాల‌కు స‌మంత ప్లాన్ చేస్తుండ‌డం ఆస‌క్తిని పెంచుతోంది. ఇక ఇదే హుషారులో ఓ హాలీవుడ్ సినిమాలోనూ న‌టించేస్తున్న సంగ‌తి తెలిసిందే. ఓబేబి నిర్మాత‌ల‌తో ఈ హాలీవుడ్ సినిమా చేయ‌నుంది. తెలుగులో విజయ్ దేవరకొండతో సమంత ఓ సినిమా చేస్తోంది. అలాగే ముంబైలో ప్ర‌ముఖ ద‌ర్శ‌క‌నిర్మాత‌ల‌తో చ‌ర్చ‌ల్లో ఉంద‌న్న టాక్ ప్ర‌ముఖంగా తెలుగు ఫిల్మీ స‌ర్కిల్స్ వైర‌ల్ గా మారింది. స‌మంత ప్ర‌ధాన పాత్ర‌లో గుణ‌శేఖ‌ర్ తెర‌కెక్కించిన శాకుంత‌లం విడుద‌ల కావాల్సి ఉంది.