'టైగర్ నాగేశ్వరరావు' ప్రీ లుక్: ఊర మాస్ అవతారంలో మాస్ మహారాజా..!

మాస్ మహారాజా రవితేజ ప్రస్తుతం ''టైగర్ నాగేశ్వరావు'' అనే ఆసక్తికరమైన ప్రాజెక్ట్ లో నటిస్తున్న సంగతి తెలిసిందే. 'దొంగాట' ఫేమ్ వంశీ దర్శకత్వంలో తెరకెక్కుతున్న ఈ సినిమాతో రవితేజ పాన్ ఇండియాలోకి అడుగుపెట్టబోతున్నాడు.

ఉగాది పర్వదినాన్ని పురస్కరించుకుని ఈ రోజు శనివారం 'టైగర్ నాగేశ్వరరావు' మోషన్ పోస్టర్‌ తో పాటు ఈ సినిమా ప్రీ లుక్ పోస్టర్‌ ని మేకర్స్ ఆవిష్కరించారు. ఇందులో రైలు వేగంగా దూసుకు వస్తుండగా.. రవితేజ ధైర్యంగా రైల్వే ట్రాక్‌ పై నిలబడి ఉన్నాడు.

రవితేజ చొక్కా లేకుండా తన బాడీని చూపిస్తున్న లుక్ అందరినీ ఆశ్చర్యపరుస్తోంది. చేతిలో కొరడాని చూస్తుంటే అతను పెద్ద యాక్షన్ కు సిద్ధంగా ఉన్నాడని తెలుస్తోంది. ఈ పవర్ ఫుల్ పాత్ర కోసం మాస్ రాజా సరికొత్తగా మేక్ఓవర్ అయ్యారు.

ఇందులో రవితేజ బాడీ లాంగ్వేజ్ - గెటప్ మరియు డిక్షన్ పూర్తిగా భిన్నంగా ఉంటాయని.. అతని కెరీర్ లో ఇంతకుమునుపెన్నడూ పోషించని పాత్రలో అలరించనున్నారని చిత్ర బృందం చెబుతోంది.

మోషన్ పోస్టర్ కు మ్యూజిక్ డైరెక్టర్ జివి ప్రకాష్ కుమార్ అందించిన అద్భుతమైన బ్యాక్‌గ్రౌండ్ స్కోర్‌ ఆకర్షణీయంగా ఉంది. విజువల్స్ టాప్ క్లాస్ అనే చెప్పాలి. ఈ సినిమాలో రవితేజ సరసన నూపూర్ సనన్ మరియు గాయత్రి భరద్వాజ్ లను హీరోయిన్లుగా ఎంపిక చేశారు.

ఈరోజు మాదాపూర్‌ లోని హెచ్ఐసిసి నోవాటెల్‌ లో 'టైగర్ నాగేశ్వరరావు' సినిమాకు సంబంధించి గ్రాండ్ లాంచింగ్ ఈవెంట్‌ నిర్వహించనున్నారు. ఈ వేడుకకు మెగాస్టార్ చిరంజీవితో పాటుగా కేంద్రమంత్రి కిషన్ రెడ్డి మరియు 'ది కాశ్మీర్ ఫైల్స్' దర్శకుడు వివేక్ అగ్నిహోత్రి అతిథిలుగా హాజరుకానున్నారు.

'టైగర్ నాగేశ్వరరావు' చిత్రాన్ని తేజ్ నారాయణ్ అగర్వాల్ సమర్పణలో అభిషేక్ అగర్వాల్ ఆర్ట్స్ పై నిర్మాత అభిషేక్ అగర్వాల్ భారీ బడ్జెట్ తో ప్రతిష్టాత్మకంగా నిర్మించనున్నారు. మయాంక్ సింఘానియా సహ నిర్మాతగా వ్యవహరిస్తున్నారు.

తెలుగు, తమిళం, కన్నడ, మలయాళం, హిందీ భాషల్లో ఈ సినిమా రూపొందనుంది. 70వ దశకంలో దక్షిణ భారతదేశంలో పోలీసులకు ముచ్చెమటలు పట్టించిన మోస్ట్ వాంటెడ్ స్టువర్టుపురం దొంగ నాగేశ్వరరావు జీవిత కథ ఆధారంగా ఈ సినిమా తెరకెక్కుతోంది.

జీవీ ప్రకాష్ కుమార్ సంగీతం సమకూరుస్తున్న ఈ సినిమాకి శ్రీకాంత్ విస్సా డైలాగ్స్ రాస్తున్నారు. ఆర్. మధే సినిమాటోగ్రఫీ నిర్వహిస్తుండగా.. అవినాష్ కొల్లా ప్రొడక్షన్ డిజైనర్ గా వర్క్ చేస్తున్నారు.