బన్నీ కూడా పులితో ఫైట్ చేయబోతున్నాడా..?

ఐకాన్ స్టార్ అల్లు అర్జున్ - రష్మిక మందన్నా హీరోహీరోయిన్లుగా సుకుమార్ దర్శకత్వంలో తెరకెక్కిన చిత్రం ''పుష్ప: ది రైజ్''. గతేడాది చివర్లో వచ్చిన ఈ సినిమా.. బాక్సాఫీస్ వద్ద బ్లాక్ బస్టర్ గా నిలిచింది. దీంతో ఇప్పుడు 'పుష్ప 2' సినిమాపై అందరిలో అంచనాలు నెలకొన్నాయి.

శేషాచలం అడవుల్లో ఎర్రచందనం స్మగ్లింగ్ బ్యాక్ డ్రాప్ లో 'పుష్ప' సినిమా రూపొందింది. ఇందులో పుష్పరాజ్ గా బన్నీ రా అండ్ రస్టిక్ లుక్ లో ఊర మాస్ అవతార్ లో ఆకట్టుకున్నాడు. అలానే చిత్తూరు స్లాంగ్ లో 'తగ్గలేదే' అంటూ అతను చూపించిన మ్యానరిజంకి అందరూ బాగా కనెక్ట్ అయ్యారు.

కూలీగా జీవితాన్ని ప్రారంభించిన పుష్పరాజ్.. ఎర్ర చందనం స్మగ్లింగ్ సిండికేట్ ను శాసించే స్థాయికి ఎలా ఎదిగాడనేది 'పుష్ప 1' లో చూపించారు. ఇప్పుడు 'పుష్ప: ది రూల్' లో ఎలాంటి కథను చెప్పబోతున్నారు? పుష్ప రాజ్ ఎలాంటి లుక్ లో కనిపించబోతున్నారు? అనే ఆసక్తి అందరిలో ఉంది. ఈ నేపథ్యంలో ఇటీవల బన్నీ లుక్ టెస్ట్ చేసినట్లు తెలుస్తోంది.

'పుష్ప-1' ఊహించిన దానికంటే భారీ విజయం సాధించడంతో.. ఇప్పుడు ''పుష్ప 2'' విషయంలో సుక్కూ అండ్ టీమ్ చాలా జాగ్రత్తలు తీసుకుంటున్నారని తెలుస్తోంది. అంచనాలకు ఏమాత్రం తగ్గకుండా.. అంతకు మించి ఉండేలా భారీ స్థాయిలో రూపొందించడానికి ప్లాన్ చేస్తున్నారు.

అట‌వీ నేప‌థ్యంలో సాగే క‌థ కాబట్టి.. ఈసారి క్రూర మృగాలతో పోరాటాలు పెట్టాలని సుకుమార్ ఆలోచిస్తున్నారట. ఇందులో భాగంగా రెండో భాగంలో పుష్ప రాజ్ కు పులితో ఫైట్ పెట్టబోతున్నారని రూమర్స్ వస్తున్నాయి. RRR లో ఎన్టీఆర్‌ ఇంట్రడక్షన్ లో పులితో తలపడే సీన్ సినిమాలో హైలెట్స్ లో ఒకటిగా నిలిచింది. ఇప్పుడు 'పుష్ప 2' లో అలాంటి సన్నివేశం పెట్టనున్నారట.

టెక్నాలజీ అందుబాటులోకి వచ్చిన తర్వాత సినిమాల్లో జంతువులతో పోరాడే స‌న్నివేశాల‌ను సీజీలో క్రియేట్ చేస్తున్నారు. 'ఆర్.ఆర్.ఆర్' సినిమాలో కూడా పులి లేకుండానే గ్రాఫిక్స్ తో దర్శకధీరుడు రాజమౌళి ఆ సీన్ ని చూపించారు. కానీ ఇప్పుడు సుకుమార్ మాత్రం సీజీని నమ్ముకోకుండా.. రియాలిటీ కోసం నిజ‌మైన పులితోనే ఫైట్ చేయించాలని చూస్తున్నారట.

ఈ నేపథ్యంలో విదేశాల్లో ఫ్రెండ్లీ టైగర్స్ ని 'పుష్ప 2' కోసం రంగంలోకి దింపనున్నారని టాక్ నడుస్తోంది. అంతేకాదు అల్లు అర్జున్ సైతం పులితో తలపడటానికి ట్రైనింగ్ తీసుకుంటున్నాడని అంటున్నారు. ఇందులో నిజమెంతనేది తెలియదు కానీ.. ఒకవేళ నిజమైతే మాత్రం ప్రేక్షకులను సరికొత్త అనుభూతిని ఇస్తుందని చెప్పాలి.

ఇకపోతే 'పుష్ప' పార్ట్ 1 వచ్చి ఏడాది కావొస్తున్నా.. ఇంత వరకూ 'పుష్ప 2' సెట్స్ పైకి వెళ్లలేదు. ఈ ఏడాది మార్చిలోనే రెగ్యులర్ షూటింగ్ అని చెప్పిన మేకర్స్.. ఇంకా అల్లు అర్జున్ లుక్ టెస్ట్ చేస్తుండటంపై.. ప్రీ ప్రొడక్షన్ వర్క్ కోసమే ఇంత సమయం కేటాయించడం కొందరు అభిమానులు ఇబ్బంది పెడుతోంది.

అప్పుడంటే కరోనా మహమ్మారి వల్ల ఆలస్యం అయింది అనుకోవచ్చు.. కానీ ఇప్పుడెందుకు డిలే అవుతోందని అడుగుతున్నారు. ప్రీ ప్రొడక్షన్ ఇలా నత్త నడకన సాగితే.. సినిమా ఎప్పుడు స్టార్ట్ చేస్తారు? ఎప్పుడు ఫినిష్ చేస్తారు? రిలీజ్ చేయడానికి ఎంత టైం తీసుకుంటారు? అంటూ సుక్కూని ప్రశ్నిస్తున్నారు.

షూటింగ్ అప్డేట్ ఇవ్వమని ఎప్పటిలాగే మేకర్స్ ను ట్రోల్ చేస్తున్నారు. మరి ఇప్పుడైనా 'పుష్ప 2' టీం ఫ్యాన్స్ బాధ అర్థం చేసుకుంటారేమో చూడాలి.

కాగా, 'పుష్ప: ది రూల్' సినిమాలో అల్లు అర్జున్ సరసన హీరోయిన్ గా రష్మిక మందన్నా కొనసాగనుంది. అలానే ఫహాద్ ఫాజిల్ - జగదీష్ - సునీల్ - అనసూయ - రావు రమేష్ - అజయ్ పాత్రలు కూడా రెండో భాగంలో ఉంటాయి. సాయి పల్లవి - విజయ్ సేతుపతి - ప్రియమణి వంటి మరికొన్ని పాత్రలు యాడ్ అవుతాయని రూమర్స్ వస్తున్నాయి.

మైత్రీ మూవీ మేకర్స్ బ్యానర్ లో భారీ బడ్జెట్ తో 'పుష్ప 2' సినిమా రూపొందనుంది. రాక్ స్టార్ దేవిశ్రీ ప్రసాద్ మ్యూజిక్ కంపోజ్ చేస్తున్నారు. పార్ట్-1 కోసం వర్క్ చేసిన కోర్ టీమ్ అంతా 'పుష్ప: ది రూల్' లోనూ భాగం కానున్నారు. త్వరలోనే దీనికి సంబంధించిన అన్ని విషయాలపై క్లారిటీ వచ్చే అవకాశం ఉంది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.