ఇస్మార్ట్ శంకర్ కు ఇద్దరు బెంగళూరు భామలు!

ఎనర్జెటిక్ హీరో రామ్ - పూరి జగనాధ్ కాంబినేషన్ లో 'ఇస్మార్ట్ శంకర్' సినిమా తెరకెక్కుతున్న సంగతి తెలిసిందే. ఈమధ్యే షూటింగ్ ప్రారంభం అయిన ఈ చిత్రానికి తాజాగా హీరోయిన్లను ఫైనలైజ్ చేశారని సమాచారం. ఇస్మార్ట్ గా ఉండే శంకర్ కు ఇద్దరు ఇస్టైల్ గా ఉండే బ్యూటీలను ఫిక్స్ చేశాడట పూరి.

'నన్ను దోచుకొందువటే' సినిమాలో నటనతో ప్రేక్షకులను మెప్పించిన నభా నటేష్ ను ఒక హీరోయిన్ గా .. 'సవ్యసాచి' తో టాలీవుడ్ ఎంట్రీ ఇచ్చి 'Mr.మజ్ను' లో కూడా నటించిన నిధి అగర్వాల్ ను మరో హీరోయిన్ గా ఎంచుకున్నారని సమాచారం. కొత్త హీరోయిన్లను వెతికి తీసుకురావడంలో.. టాలెంటెడ్ హీరోయిన్లకు మంచి పాత్రలు డిజైన్ చేసి బ్రేక్ ఇవ్వడంతో పూరి స్పెషలిస్ట్. హీరోయిన్లను గ్లామరస్ గా చూపించడంలో లిమిట్స్ ఏవీ పెట్టుకోడు కాబట్టి ప్రేక్షకులు రామ్ యాక్షన్ తో పాటూ... ఇద్దరు బ్యూటీల గ్లామర్ షోకు కూడా ఫిక్స్ అయిపోవచ్చు. ఎప్పుడూ ముంబై నుండి హీరోయిన్లను హైదరాబాదుకు తీసుకొచ్చే పూరి ఈసారి బెంగళూరు బ్యూటీలను ఎంచుకోవడం విశేషం.

యాక్షన్ ఎంటర్టైనర్ గా తెరకెక్కుతున్న ఈ సినిమా పూరి జగన్నాధ్ - ఛార్మీలు సంయుక్తంగా నిర్మిస్తున్నారు. ఈ సినిమాకు పనిచేసే అందరూ హిట్ కోసం చకోరపక్షుల్లా ఎదురుచూసే వారు కావడంతో వారందరికీ ఈ సినిమా ఫలితం కీలకం కానుంది.