బిగ్ బేబీ బ్రదర్ కి నిహారిక రాఖీ.. ఇంత‌కీ ఎవ‌రు ఆ బ్ర‌ద‌ర్?

మెగా బ్ర‌ద‌ర్ నాగ‌బాబు గారాల కుమార్తె నిహారిక కొణిదెల కెరీర్ జ‌ర్నీ లైఫ్ స్టైల్ గురించి తెలిసిందే. ఆరంభం `ఢీ` అనే బుల్లితెర షోతో తెలుగు ప్రేక్ష‌కుల‌కు సుప‌రిచిత‌మైన నిహారిక ఆ త‌ర్వాత ప‌లు టీవీ షోల‌తో అల‌రించారు. అలాగే ల‌ఘుచిత్రాల‌తోనూ అభిమానుల్ని పెంచుకున్నారు. అనంత‌రం వెబ్ సిరీస్ ల‌ను నిర్మిస్తూ.. వాటిలో తాను కూడా న‌టిస్తూ న‌టిగా కెరీర్ ని మ‌లుచుకునేందుకు ప్ర‌య‌త్నించారు. ఈ ప్ర‌యాణంలో న‌టిగా ఎంతో ప‌రిణ‌తి సాధించిన నిహారిక మునుముందు వెబ్ సిరీస్ ల నిర్మాత‌గా.. పెద్ద తెర నిర్మాత‌గానూ భారీ ప్ర‌ణాళిక‌ల‌ను క‌లిగి ఉన్నారు. టీవీ షోలు.. ల‌ఘు చిత్రాలు.. వెబ్ సిరీస్ లతో జ‌ర్నీ సాగిస్తూనే పెద్ద తెర న‌టిగా నిర్మాత‌గా ఎద‌గాల‌న్న ప్ర‌ణాళిక‌లు ఉన్నాయి.

నిహారిక కొణిదెల ఇటీవ‌లే ఐటీ ఉద్యోగి చైత‌న్య జొన్న‌ల‌గ‌డ్డ‌ను వివాహ‌మాడారు. ఈ జంట‌ డెస్టినేష‌న్ వెడ్డింగ్ జాతీయ స్థాయిలో చ‌ర్చ‌నీయాంశ‌మైంది. అయితే పెళ్లి త‌ర్వాతా న‌టిస్తుందా లేదా? అన్న సందేహాల‌కు చెక్ పెడుతూ.. త‌న కెరీర్ కి ఎలాంటి డోఖా లేకుండా కొన‌సాగుతోంది. న‌టిగా నిర్మాత‌గా నిహారిక జ‌ర్నీ ఆద్యంతం ఉత్కంఠ‌ను పెంచుతోంది.

అలాగే సోష‌ల్ మీడియాల్లోనూ నిహారిక కు ఉన్న అసాధార‌ణ ఫాలోయింగ్ గురించి తెలిసిందే. ఇన్ స్టా ట్విట్ట‌ర్ ఎఫ్.బిలో నిహారిక ఎంతో యాక్టివ్ గా ఉంటారు. నిరంత‌రం తనకు సంబంధించిన వ్య‌క్తిగ‌త వృత్తిగ‌త ఫోటోలు వీడియోల‌ను షేర్ చేస్తూ భారీ ఫాలోయింగ్ ని సంపాదించుకున్నారు. తాజాగా తన ఇన్ స్టాగ్రామ్ ఖాతాలో ఓ ఫొటోను షేర్ చేసి `మా బిగ్ బ్రదర్` అంటూ ఓ కుర్రాడిని ప‌రిచ‌యం చేశారు. ``కొంచెం ఆలస్యంగా.. మా బిగ్ బేబీ బ్రదర్ కు రాఖీ పండుగ శుభాకాంక్షలు. తను ఎవరో క్లూ ఇవ్వాల్సిన అవసరం లేదు`` అంటూ పోస్ట్ చేయ‌గా.. ఇత‌డు ఎవ‌రో గుర్తు ప‌ట్టండి అంటూ నిహారిక ఫ‌జిల్ వేయ‌డంతో అభిమానులు అంతే వేగంగా స్పందించారు.

ఇంత‌కీ ఎవ‌రా బిగ్ బ్ర‌ద‌ర్ ? అంటే.. బాబాయ్ ప‌వ‌న్ క‌ల్యాణ్ న‌ట‌వార‌సుడు `ఆరున్న‌ర అడుగుల బుల్లెట్టు` అకీరా నంద‌న్ .. ప‌సుపు రంగు టీష‌ర్ట్.. డెనిమ్స్ ధ‌రించిన అకీరా నంద‌న్ తో సోద‌రి నిహారిక అలా ఫోటో దిగి సోష‌ల్ మీడియాలో షేర్ చేయ‌గా అది ప‌వ‌న్..నిహారిక‌ అభిమానుల్లో జెట్ స్పీడ్ తో వైర‌ల్ అయ్యింది.

ర‌క్షాబంధ‌న్ .. అలాగే పెద‌నాన్న మెగాస్టార్ చిరంజీవి బ‌ర్త్ డే రెండూ క‌లిసి రావ‌డంతో నిహారిక ఎక్కువ స‌మ‌యం 22 ఆగ‌స్టు రోజంతా పెద‌నాన్న ఇంట్లోనే గ‌డిపారు. త‌న సోద‌రులు రామ్ చ‌ర‌ణ్ -వ‌రుణ్ తేజ్ -అకీరా నంద‌న్ అంద‌రికీ రాఖీలు క‌ట్టి సంద‌డి చేయ‌డ‌మే గాక పెద‌నాన్న‌తో క‌లిసి బ‌ర్త్ డే పార్టీలో స్టెప్పుల‌తో సంద‌డి చేసిన ఫోటో వైర‌ల్ అయ్యింది. అలాగే పెద‌నాన్న‌కు ప్ర‌త్యేకించి పుట్టిన‌రోజు శుభాకాంక్ష‌లు తెలియ‌జేసి ఆయ‌న దివ్యాశీస్సుల‌ను అందుకుంది.

సొంత బ్యాన‌ర్ సిరీస్ ల‌తో బిజీ

నిహారిక `పింక్ ఎలిఫెంట్ పిక్చర్స్` అనే బ్యానర్ స్థాపించి అందులో వ‌రుస‌గా వెబ్ సిరీస్ లు నిర్మిస్తున్న సంగ‌తి తెలిసిందే. ముద్దపప్పు ఆవకాయ్-నాన్న కూచీ అనే వెబ్ సిరీస్ లను నిర్మించి నటించిన నిహారిక `ఒక మనసు` చిత్రంతో పెద్ద తెర‌కు క‌థానాయిక‌గా ప‌రిచ‌య‌మైంది. నాగ‌శౌర్య స‌ర‌స‌న న‌టించిన ఈ సినిమా ఆశించిన విజ‌యం అందుకోక‌పోవ‌డం నిరాశ‌ప‌రిచింది. ఆ త‌రవాత హ్యాపీ వెడ్డింగ్ - సూర్య‌కాంతం చిత్రాల‌తో న‌టిగా నిరూపించుకుంది. కానీ బ్లాక్ బ‌స్ట‌ర్లు ద‌క్కించుకోలేక‌పోయింది. పెద‌నాన్న చిరంజీవి న‌టించిన `సైరా: నరసింహారెడ్డి` మూవీలో గిరిజ‌న బిజిలీ త‌ర‌హాలో త‌ళుక్కున వార్ లో మెరిసే రోల్ లో క‌నిపించింది. మునుముందు నిహారిక సొంత బ్యాన‌ర్ సిరీస్ ల‌తో దూసుకుపోవాల‌ని ప్లాన్ చేస్తోంది. సినీనిర్మాత‌గానూ రాణించేందుకు అవ‌స‌ర‌మైన అనుభ‌వాన్ని సంపాదించ‌నుంది. ప్ర‌స్తుతం ఓ వెబ్ సిరీస్ లో న‌టిస్తూ సొంత బ్యాన‌ర్ లో వెబ్ సిరీస్ ని నిర్మిస్తూ తీరిక లేకుండా గ‌డుపుతోంది.

పరిశ్ర‌మ‌లో అగ్ర కుటుంబం నుంచి ఒక క‌థానాయిక రావ‌డం అన్న‌దే ఒక పెను స‌వాల్. కానీ మెగా ఫ్యామిలీ గారాల ప‌ట్టి ఆ ఛాలెంజ్ ని స్వీక‌రించి డేరింగ్ గా న‌ట‌న‌లో కొన‌సాగుతున్నారు. తెలుగు రాష్ట్రాలు స‌హా ప్ర‌పంచ‌వ్యాప్తంగా భారీ ఫాలోయింగ్ ఉన్న మెగా హీరోల అభిమానుల నుంచి ఎన్నో ఒత్తిళ్లు ఉంటాయి. అస‌లు గ్లామ‌ర్ ప‌రిశ్ర‌మ‌లో స‌రిహ‌ద్దుల‌కు ఆస్కారం ఉండ‌దు. కానీ నిహారిక వాట‌న్నిటినీ మెయింటెయిన్ చేస్తూ సాంప్ర‌దాయ బ‌ద్ధంగా ఒక చ‌క్క‌ని న‌టిగా రాణించేందుకు కొన్ని కొల‌మానాల‌తో ముందుకు సాగుతున్నారు. ప‌రిగెత్తి పాలు తాగ కుండా నెమ్మ‌దిగానే ఒక్కో అడుగు వేస్తూ త‌న‌దైన ముద్ర వేసేందుకు ప్ర‌య‌త్నిస్తున్నారు. ఇక‌పైనా త‌న జ‌ర్నీ కొన‌సాగుతుందని త‌న ప్ర‌ణాళిక‌లు వెల్ల‌డిస్తున్నాయి.