తమిళ సినిమాలో నిహారిక తెలుగు డైలాగ్

‘ఒక మనసు’ సినిమాతో హీరోయిన్ గా అరంగేట్రం చేసింది మెగా ఫ్యామిలీ అమ్మాయి కొణిదెల నిహారిక. ఐతే ఆ సినిమా ఆమెకు చేదు అనుభవం మిగిల్చింది. దీంతో రెండో సినిమా విషయంలో చాలా గ్యాప్ తీసుకుంది నిహారిక. ఆమె తన తర్వాతి సినిమాను తమిళంలో చేయడం విశేషం. విజయ్ సేతుపతి లాంటి విలక్షణ నటుడి సినిమాలో ఆమె కథానాయికగా నటించడం విశేషం. ఆ సినిమా పేరు.. ఒరు నల్ల నాల్ పాతు సొల్రేన్. అంటే ‘ఒక మంచి రోజు చూసి చెబుతా’ అని అర్థం. ఈ పేరు మాత్రమే కాదు.. సినిమా కూడా విలక్షణంగా ఉండబోతోంది ఈ సినిమా టీజర్ చూస్తే అర్థమవుతోంది. ఈ రోజే ఈ చిత్ర టీజర్ రిలీజైంది.

విజయ్ సేతుపతి ఇందులో హీరో కమ్ విలన్ పాత్ర చేస్తుండటం విశేషం. టీజర్ చూస్తే సినిమా కాన్సెప్ట్ ఏంటన్నది అర్థం కావడం లేదు కానీ.. ఇదో వెరైటీ సినిమా అని మాత్రం అనిపిస్తోంది. విజయ్ సేతుపతి టెర్రిఫిక్ లుక్స్ తో అదరగొట్టేశాడు. నిహారికకు ఈ సినిమాకు మంచి రోలే దక్కినట్లుంది. ఆమె క్యాజువల్ లుక్ తో పాటు డ్రామాలో నటిస్తున్న పాత్రలోనూ కనిపిస్తోంది. ఈ టీజర్లో నిహారికకు ఒకటే డైలాగ్ ఉంది. ఇది తెలుగు డైలాగ్ కావడం విశేషం. ఒక చోట ఆమె ‘‘అవును అవును మామా’’ అంటుంది. మరి ఇందులో ఆమె తెలుగమ్మాయిగా నటిస్తోందేమో చూడాలి. ఆర్ముగ కుమార్ అనే కొత్త దర్శకుడు రూపొందిస్తున్న ఈ చిత్రం జనవరిలో ప్రేక్షకుల ముందుకు రానుంది. నిహారిక నటిస్తోంది కాబట్టి ఈ చిత్రం తెలుగులోనూ రిలీజయ్యే అవకాశముంది. ఇది కాక సుమంత్ అశ్విన్ తో కలిసి నిహారిక తెలుగులో ‘హ్యాపీ వెడ్డింగ్’ అనే సినిమా కూడా చేస్తున్న సంగతి తెలిసిందే.