మెగా మెగాస్టార్ తో మెగా డాట‌ర్‌!!

మెగాస్టార్ చిరంజీవి కుటుంబానికి గారాల ప‌ట్టీ నిహారిక కొణిదెల‌. ఆ గారాబం మెగాస్టార్‌కి మిత్రుడైన నేష‌న‌ల్ మెగా స్టార్‌కి మాత్రం ఉండ‌దా! అందుకే ప్రేమ‌గా భుజం మీద చెయ్యేసి ఫోటోల‌కి ఫోజులిచ్చాడు బిగ్ బీ . అమితాబ్ ను క‌లిసిన ఆనందంలో, ఆశ్చ‌ర్య‌పోతూ న‌వ్వుతూ ఫోటోల‌కి ఫోజిచ్చింది నిహారిక‌. అతి పెద్ద మెగాస్టార్‌ని క‌లిసిన మెగా ఆనందంతో ఆమె మొహం వెలిగిపోతోంది కూడా.

చిరంజీవి 151 వ చిత్రం ‘సైరా’లో అమితాబ్‌ ఓ ప్ర‌త్యేక పాత్ర‌లో న‌టిస్తున్న విష‌యం తెలిసిందే. ఈ సినిమా షూటింగ్ నిమిత్తం త‌రుచూ ఇక్క‌డికి వ‌స్తున్నాడు బిగ్ బీ. తాజాగా మెగా బ్ర‌ద‌ర్ నాగ‌బాబు కూతురు నిహారిక ఆయ‌న‌ను క‌లిసింది. గుర్తుగా ఓ ఫోటో కూడా తీయించుకుంది. దాన్ని వెంట‌నే త‌న ఇన్‌ స్టాగ్రామ్ అకౌంట్‌ లో అభిమానుల‌తో పంచుకుంది. ఓవ‌ర్ వెల్మ్‌డ్ అంటూ కామెంట్ కూడా పెట్టింది. మాన‌సికంగా అతి ద‌గ్గ‌రైన బంధం అనే అర్థంలో ఇలా పోస్ట్ చేసింద‌న్న మాట ఈ చిన్న‌ది.

తెర మీద త‌న‌కంటూ ప్ర‌త్యేక గుర్తింపు తెచ్చుకోవ‌డానికి విశ్వ ప్ర‌య‌త్నాలు చేస్తోంది నిహారిక‌. ఎన్నో అంచ‌నాల‌తో చేసిన ‘ఒక మ‌న‌సు’ చిత్రం ఆశించిన ఫ‌లితాన్ని ఇవ్వ‌క‌పోయినా, న‌టిగా నిహారికకు మాత్రం మంచి గుర్తింపుని తెచ్చిపెట్టింది. ఈ మ‌ధ్య‌నే త‌మిళంతో విజ‌య్ సేతుప‌తి ప‌క్క‌న ఓ సినిమా చేసిన నిహారిక‌, సుమంత్ అశ్విన్ స‌ర‌స‌న ‘హ్యాపీ వెడ్డింగ్’ అనే సినిమానూ పూర్తి చేసింది. తండ్రితో క‌లిసి ‘నాన్న కూచి’ అనే వెబ్ సిరీస్‌లోనూ న‌టించింది నిహారిక‌.