ఫ్లాప్ భామ బాలీవుడ్ చాన్స్ కొట్టేసిందట

ముద్దుముద్దుగా ఉంటూ కమర్షియల్ హీరోయిన్ కి ఉండాల్సిన లెక్కలన్నీ ఉన్న ముద్దుగుమ్ము నికిషా పటేల్. అన్నీ ఉన్నా కొన్నిసార్లు ప్రేక్షకుల మదిని దోచుకోవటంలో మాత్రం సక్సెస్ కాలేరు. అలాంటి కోవలోకే వస్తుంది నికిషా. కొమరంపులితో అదిరిపోయే ఎంట్రీ తో టాలీవుడ్ లోకి వచ్చినా.. అందులో అమ్మడి అందాలు పెద్దగా ఫోకస్ కాకపోవటం అమ్మడి ఫేట్ మారింది. సినిమా డిజాస్టర్ కావటంతో నికిషాకు కష్టాలు తప్పలేదు.

మిసమిస మెరిసిపోయే ఈ భామకు కొమరంపులి తర్వాత కొన్ని చాన్స్ లు వచ్చినప్పటికీ.. అవేమీ ఆమె లక్ ను మార్చలేదు. తెలుగులో కొన్ని ట్రయల్స్ వేసి.. లెక్కలు కుదరక కన్నడ సినిమాలకు వెళ్లిపోయింది. అక్కడ మంచి పేరు రావటంతో.. టాలీవుడ్ వదిలేసి.. తనలాంటి పిగరున్న భామకు బాలీవుడ్ సెట్ అవుతుందన్న నమ్మకంతో ఆ ప్రయత్నాలు షురూ చేసింది. హిందీలో ఒకట్రెండు సినిమాలకు నికిషా పేరు వినిపించినా.. సెట్స్ మీదకు మాత్రం రాలేదు.

అయినప్పటికీ నిరాశ పడకుండా తన ప్రయత్నాల్ని ఆపలేదు. తాజాగా ఈ బ్యూటీ కలలు రియాలిటీలోకి వచ్చాయంట. తాజాగా ఓ పేరున్న బాలీవుడ్ హీరోతో జత కట్టే ఛాన్స్ కొట్టేసిందంట. ఇంతకీ ఆ హీరో ఎవరమ్మా అని అడిగితే మాత్రం.. ఇప్పటికి సీక్రెట్.. త్వరలో చెప్పేస్తా అంటూ ఊరిస్తోందీ ఫ్లాప్ భామ. కన్నడలో మాదిరే హిందీలో సెట్ అవుతుందో లేదో చూడాలి మరి.