నిఖిల్ యాక్షన్ స్పై థ్రిల్లర్ షూటింగ్ ప్రారంభం..!

యంగ్ అండ్ ప్రామిసింగ్ హీరో నిఖిల్ సిద్దార్థ్ విభిన్నమైన కథలను ఎంచుకుంటూ తనకంటూ ప్రత్యేకమైన గుర్తింపు తెచ్చుకోడానికి ట్రై చేస్తున్నారు. 'అర్జున్ సురవరం' సినిమాతో సూపర్ హిట్ అందుకున్న నిఖిల్.. ఇటీవలే పల్నాటి సూర్య ప్రతాప్ తో '18 పేజెస్' షూటింగ్ పూర్తి చేశారు. అలానే చందు మొండేటి దర్శకత్వంలో 'కార్తికేయ 2' సినిమా చేస్తున్నాడు. ఈ క్రమంలో తాజాగా యువ హీరో తన 19వ చిత్రాన్ని సెట్స్ మీదకు తీసుకెళ్లారు.

'గూడాచారి' 'ఎవరు' 'HIT' లతో పాటుగా పలు సూపర్ హిట్ సినిమాలకు ఎడిటర్ గా వర్క్ చేసిన గ్యారీ బీహెచ్ ఈ మూవీతో డైరెక్టర్ గా పరిచయం అవుతున్నారు. చరణ్ తేజ్ సీఈవో గా ఉన్న రెడ్ సినిమాస్ బ్యానర్ పై కె. రాజ శేఖర్ రెడ్డి ఈ చిత్రాన్ని నిర్మిస్తున్నారు. ఈరోజు శుక్రవారం పూజా కార్యక్రమాలతో లాంఛనంగా '#Nikhil19' సినిమాని ప్రారంభించారు. దీనికి హీరోహీరోయిన్లతో పాటుగా పలువురు అతిధులు హాజరై చిత్ర బృందానికి శుభాకాంక్షలు తెలిపారు.

ఈ సందర్భాన్ని పురస్కరించుకుని ప్రముఖ నిర్మాత శరత్ మరార్ - దర్శకుడు శ్రీకాంత్ అడ్డాల మరియు నిర్మాత జెమిని కిరణ్ ఈ మూవీ స్క్రిప్ట్‌ ను మేకర్స్‌ కి అందజేశారు. #Nikhil19 ముహూర్తపు షాట్ కు గ్యారీ బిహెచ్ దర్శకత్వం వహించారు. నిర్మాత రాజ శేఖర్ రెడ్డి క్లాప్‌ బోర్డ్ కొట్టగా.. అతని పిల్లలు ఇషాన్వి మరియు ధృవ్ కెమెరా స్విచ్ ఆన్ చేసారు. ఈ సినిమా రెగ్యులర్ షూటింగ్ కూడా ఈరోజు నుండి హైదరాబాద్‌ లో మొదలు కానుంది.

నిఖిల్ 19వ చిత్రంలో ఐశ్వర్య మీనన్ హీరోయిన్ గా నటించనుంది. విభిన్న తరహా సినిమాలు చేస్తున్న నిఖిల్ మొదటిసారిగా గూఢచారి (స్పై) గా నటించబోతున్నారు. పూర్తి స్థాయి యాక్షన్ ప్యాక్డ్ ఎంటర్‌టైనర్‌ గా తెరకెక్కుతున్న ఈ చిత్రానికి త్వరలోనే టైటిల్ ఖరారు చేస్తారు. మనోజ్ రెడ్డి ఈ చిత్రానికి సినిమాటోగ్రాఫర్ గా వర్క్ చేయనుండగా.. డైరెక్టర్ గ్యారీ బిహెచ్ ఎడిటింగ్ కూడా చూసుకుంటారు. శ్రీచరణ్ పాకాల ఈ సినిమాకి సంగీతం సమకూర్చనున్నారు. అనిరుధ్ కృష్ణమూర్తి రచయితగా పని చేస్తున్నారు. అర్జున్ సూరిశెట్టి ఆర్ట్ డైరెక్షన్ విభాగాన్ని నిర్వహిస్తుండగా.. రవి ఆంటోనీ ప్రొడక్షన్ డిజైనర్ గా వ్యవహరించనున్నారు.