లీకెడ్ పిక్ : నిఖిల్ అలియాస్ అర్జున్ సురవరం

కిరాక్ పార్టీ విడుదల కోసం వెయిట్ చేస్తున్న హీరో నిఖిల్ కొత్త సినిమా ఎక్కువ సౌండ్ చేయకుండా సెట్స్ పైకి వెళ్లిపోయింది. తమిళ్ లో సూపర్ హిట్ గా నిలిచిన కనితన్ రీమేక్ గా రూపొందుతున్న ఈ మూవీలో నిఖిల్ ఒక రిపోర్టర్ గా నటించబోతున్నాడు. దీనికి సంబంధించిన ఒక పిక్ లీక్ కావడం వైరల్ గా మారుతోంది. ఇందులో నిఖిల్ పేరు అర్జున్ సురవరం. ప్రెస్ రిపోర్టర్ గా నిఖిల్ చేస్తున్న పాత్రకు సంబంధించిన ఐడి కార్డు బయటికి రావడంతో ఫాన్స్ దాన్ని షేర్ చేసేసుకుంటున్నారు. ఒరిజినల్ వెర్షన్ తీసిన టిఎన్ సంతోష్ తెలుగుకు కూడా దర్శకత్వ బాధ్యతలు తీసుకున్నాడు. టాగోర్ మధు నిర్మాతగా వ్యవహరిస్తున్న ఈ మూవీ అవుట్ అండ్ అవుట్ థ్రిల్లర్ గా ఉండబోతోందని టాక్. యధాతధంగా తీయకుండా ఇక్కడి నేటివిటీకి తగ్గట్టు చాలా మార్పులు జోడించి తీసినట్టు తెలిసింది.

గచ్చిబౌలిలో షూటింగ్ ప్రారంభించేసుకున్న ఈ మూవీ త్వరగానే ఫినిష్ చేసేలా ప్లాన్ చేస్తున్నారు. థ్రిల్లర్ జానర్ లో ఉండే మూవీ తమిళ్ లో ఘన విజయం సాధించింది. హీరొయిన్ గా ఎవరిని తీసుకోవాలనే విషయం ఇంకా నిర్ధారించుకోలేదు. తమిళ్ లో చేసిన క్యాథరిన్ త్రెస్సానే అనుకున్నారనే వార్తలు కొద్ది రోజుల క్రితం వచ్చాయి కాని అవి నిజం కాదని తేలిపోయింది. కేశవ తర్వాత నిఖిల్ కొంత గ్యాప్ తీసుకున్నాడు. కిరాక్ పార్టీ షూటింగ్ కు టైం పట్టినా క్వాలిటీ కోసం రాజీ పడకపోవడంతో ఆలస్యం అయ్యింది.

ఒక రివెంజ్ డ్రామా, ఒక యూత్ ఫుల్ కాలేజీ స్టొరీ, ఒక థ్రిల్లర్ ఇలా ఒకదానికి ఒకటి సంబంధం లేకుండా కథల ఎంపికలో చాలా జాగ్రత్తలు తీసుకుంటున్న నిఖిల్ కనితన్ రీమేక్ కోసం ప్రత్యేక శ్రద్ధ తీసుకుంటున్నట్టు టాక్. వరసగా రెండు రీమేక్ సినిమాలు చేసి అందరిని ఆశ్చర్యపరిచిన ఈ కుర్ర హీరో వీటి తర్వాత చేయబోయేది మాత్రం ఇంకా ఫైనల్ చేయలేదు.