తమిళ హీరోలకు షాకిచ్చాడు

దీపావళికి తమిళ సినిమాలే తెలుగు బాక్సాఫీస్ ను ఏలాయి. మూడు వారాల విరామం తర్వాత మరోసారి టాలీవుడ్ బాక్సాఫీస్ ను కబ్జా చేయడానికి రెండు తమిళ సినిమాలు రెడీ అయ్యాయి. అందులో ఒకటి విజయ్ ఆంటోనీ సినిమా ‘బేతాళుడు’ కాగా.. ఇంకోటి విశాల్ నటించిన ‘ఒక్కడొచ్చాడు’. నిజానికి ఈ రెండు సినిమాలు కూడా దీపావళికే రావాల్సింది కానీ.. పోటీ ఎక్కువైందని వాయిదా వేశారు. నవంబరు 18న చెప్పుకోదగ్గ తెలుగు సినిమాలేవీ షెడ్యూల్ కాకపోవడం చూసి ముందు కర్చీఫ్ వేసేశారు. ఐతే ఈ మధ్యే శ్రీనివాసరెడ్డి సినిమా ‘జయమ్ము నిశ్చయమ్మురా’ అదే రోజుకు రిలీజ్ డేట్ కన్ఫమ్ చేసుకుంది. ఆ సినిమా మీద పాజిటివ్ బజ్ ఉన్నప్పటికీ ఎంతైనా చిన్న సినిమా కాబట్టి తమిళ చిత్రాలకు మరీ అంత ఇబ్బంది లేకపోవచ్చు. ఐతే ఇప్పుడు ఓ క్రేజీ తెలుగు మూవీ 18న రిలీజ్ కు రెడీ అయిపోయింది. ఆ చిత్రమే.. ఎక్కడికి పోతావు చిన్నవాడా.

నిఖిల్ కథానాయకుడిగా తమిళ దర్శకుడు వీఐ ఆనంద్ రూపొందించిన ‘ఎక్కడికి పోతావు చిన్నవాడా’ మీద మంచి అంచనాలున్నాయి. ఈ సైన్స్ ఫిక్షన్ మూవీ టీజర్ ఇప్పటికే జనాల్లో చర్చనీయాంశమైంది. తాజాగా రిలీజ్ చేసిన పాట కూడా ఆకట్టుకుంటోంది. త్వరలోనే ఆడియో.. ట్రైలర్ రిలీజ్ చేయనున్నారు. అప్పటికి క్రేజ్ ఇంకా పెరగొచ్చు. సెకండ్ ఇన్నింగ్స్ లో వరుసగా వైవిధ్యమైన.. కథాబలమున్న సినిమాలు చేస్తూ మెప్పిస్తున్నాడు నిఖిల్. ఆ కోవలోనే ‘ఎక్కడికి పోతావు చిన్నవాడా’ కూడా ప్రామిసింగ్ గా అనిపిస్తోంది. ఈ సినిమా 18న రిలీజ్ కాబోతుండటం తమిళ హీరోలకు షాకే. మరి ఈ పోరులో ఎవరు గెలుస్తారో చూద్దాం.

Like Us on Facebook : https://www.facebook.com/Tupakidotcom/