అర్థరాత్రి కెమెరా పట్టుకుని నిఖిల్‌..!

యువ హీరో నిఖిల్‌ ఈమద్య కొందరు కాలేజ్‌ కుర్రాళ్లను కొట్టాడని - తన రౌడీయిజంను చూపించే ప్రయత్నం చేశాడు అంటూ సోషల్‌ మీడియాలో పుకార్లు షికార్లు చేస్తున్న విషయం తెల్సిందే. తనపై వస్తున్న విమర్శలకు నిఖిల్‌ సమాధానం చెప్పాడు. తాను తన తమ్ముడికి మద్దతుగా వెళ్లాను తప్ప ఎవరిపై దాడి చేయలేదు అంటూ క్లారిటీ ఇచ్చాడు. ఇక ప్రస్తుతం నిఖిల్‌ రాత్రి సమయంలో చేతిలో కెమెరా పట్టుకుని - స్టింగ్‌ ఆపరేషన్‌ కు సిద్దం అయ్యాడు. రాత్రి సమయంలో క్రిమినల్స్‌ గుట్టు విప్పేందుకు నిఖిల్‌ చేస్తున్న స్టింగ్‌ ఆపరేషన్‌ కు హైదరాబాద్‌ వేదిక అయ్యింది.

నిఖిల్‌ స్టింగ్‌ ఆపరేషన్‌ ఏంటా అంటూ ఆశ్చర్యపోతున్నారా.. అసలు విషయం ఏంటీ అంటే ప్రస్తుతం నిఖిల్‌ ‘ముద్ర’ అనే చిత్రంలో నటిస్తున్న విషయం తెల్సిందే. తమిళంలో సూపర్‌ హిట్‌ అయ్యి, మంచి వసూళ్లను రాబట్టిన ‘కణిదన్‌’ చిత్రానికి ‘ముద్ర’ రీమేక్‌. ఈ చిత్రంలో హీరో పాత్ర ఇన్వెస్టిగేషన్‌ జర్నలిస్ట్‌. రాజకీయ నాయకుల మరియు క్రిమినల్స్‌ బండారాలను తన ఇన్వెస్టిగేషన్‌ జర్నలిజంతో ఎలా బయట పెట్టాడు అనేది ముద్ర సినిమాలో చూడవచ్చు.

జర్నలిస్టు పాత్ర కోసం నిఖిల్‌ ప్రత్యేకంగా సిద్దం అయ్యాడు. మీడియా పర్సన్‌ పాత్రను చాలా తేలికగా తీసుకోకుండా గ్రౌండ్‌ వర్క్‌ చేసి మరీ చాలా నేర్చుకున్నట్లుగా ఆమద్య నిఖిల్‌ చెప్పుకొచ్చాడు. ప్రస్తుతం ‘ముద్ర’ సీన్స్‌ ను హైదరాబాద్‌ లోని పలు ప్రాంతాల్లో నైట్‌ షూట్‌ చేస్తున్నారు. రాత్రి సమయంలో స్టింగ్‌ ఆపరేషన్‌ కు సంబంధించిన సీన్స్‌ ను చిత్రీకరిస్తున్నట్లుగా సమాచారం అందుతుంది. లావణ్య త్రిపాఠి హీరోయిన్‌ గా నటిస్తున్న ఈ చిత్రంకు టీఎన్‌ సంతోష్‌ దర్శకత్వం వహిస్తున్నాడు. నిఖిల్‌ ఈ చిత్రంపై చాలా నమ్మకంగా ఉన్నాడు.