నిఖిల్.. చందూకు క్రెడిట్ ఇచ్చాడు

ఈ శుక్రవారం విడుదలైన నిఖిల్ సినిమా ‘ఎక్కడికి పోతావు చిన్నవాడా’ యునానమస్ హిట్ టాక్ తో దూసుకెళ్తోంది. పెద్ద నోట్ల రద్దు నేపథ్యంలో వారం పది రోజులుగా సినిమాలపై తీవ్ర ప్రతికూల ప్రభావం ఉన్నా సరే.. ఈ సినిమా హౌస్ ఫుల్ కలెక్షన్లు సాధిస్తుండటం అద్భుతమైన విషయమే. తొలి రోజు ఉదయం ఫుల్ పాజిటివ్ టాక్ రావడంతో సాయంత్రానికి కలెక్షన్లు బాగా పుంజుకున్నాయి.

ఈ సినిమాలో ఎవరికి కావాల్సింది వాళ్లకుంది. లవ్.. సస్పెన్స్.. హార్రర్.. థ్రిల్.. కామెడీ.. ఇలా అన్ని ఆకర్షణలూ ఉన్నాయి. అన్నింట్లోకి ప్రేక్షకుల్ని అమితంగా ఆకట్టుకుంటున్నది కామెడీనే. ఇందులో మాటల రచయిత అబ్బూరి రవి పాత్ర కీలకం. అలాగే యువ దర్శకుడు చందూ మొండేటి పాత్ర కూడా ఉన్నట్లుగా నిన్నట్నుంచి వార్తలొస్తున్నాయి. ఐతే ఇది జస్ట్ రూమర్ కాదని.. అది నిజమే అని హీరో నిఖిల్ కూడా కన్ఫమ్ చేశాడు.

ఓవైపు ‘ప్రేమమ్’ పనిలో బిజీగా ఉన్నప్పటికీ తన సినిమాకు చందూ సాయం చేశాడని నిఖిల్ వెల్లడించాడు. ఏ సన్నివేశం అన్నది స్పష్టంగా చెప్పలేదు కానీ.. ఒక సన్నివేశానికి చందూ మాటలు రాశాడని వెల్లడిస్తూ.. ‘ఎ ఫ్రెండ్ ఇన్ నీడ్ ఈజ్ ఎ ఫ్రెండ్ ఇండీడ్’ అనే కొటేషన్ కూడా జోడించాడు నిఖిల్. దీంతో చందూ-నిఖిల్ బంధం ఎంత గట్టిదో అందరికీ మరోసారి అర్థమైంది. చందూ ఇంతకుముందు ‘సూర్య వెర్సస్ సూర్య’కు కూడా మాటలు రాసిన సంగతి తెలిసిందే.

Like Us on Facebook : https://www.facebook.com/Tupakidotcom/