రాజమౌళికి భయపడ్డాడు.. చైతూకు కాదు

అనుకున్నట్లే ‘బాహుబలి: ది కంక్లూజన్’ ప్రపంచవ్యాప్తంగా కళ్లు చెదిరే వసూళ్లతో దూసుకెళ్తోంది. ఈ సినిమాకు భయపడి దేశవ్యాప్తంగా అన్ని ఇండస్ట్రీల వాళ్లూ పోటీగా కొత్త సినిమాలు రిలీజ్ చేయకపోవడం సమంజసమే అనిపిస్తోంది. ఐతే ప్రస్తుతం బాహుబలి-2 ప్రభంజనం చూస్తుంటే.. ఇంకో రెండు మూడు వారాల పాటు మరే సినిమాకూ అవకాశం ఇచ్చేలా కనిపించట్లేదు. ఎలాంటి సినిమా వచ్చినా దీని ముందు నిలిచే పరిస్థితి కనిపించట్లేదు.

అందుకే మే 12న రిలీజ్ చేయాలనుకున్న ‘కేశవ’ సినిమాను ఆ తేదీ నుంచి వాయిదా వేసేశారు. ఈ చిత్రాన్ని మే 19న రిలీజ్ చేస్తారట. ఐతే ఆ రోజుకు ఆల్రెడీ నాగచైతన్య సినిమా ‘రారండోయ్ వేడుక చూద్దాం’ షెడ్యూల్ అయి ఉంది. ‘సోగ్గాడే చిన్నినాయనా’ ఫేమ్ కళ్యాణ్ కృష్ణ రూపొందించిన ఈ చిత్రంపై మంచి అంచనాలున్నాయి. అయినప్పటికీ ‘కేశవ’ నిర్మాత భయపడట్లేదు. పోటీకి సై అంటున్నాడు. దీంతో 19న రసవత్తర బాక్సాఫీస్ సమరానికి రంగం సిద్ధమైనట్లే.

‘స్వామి రారా’ తర్వాత నిఖిల్-సుధీర్ వర్మ కాంబినేషన్లో తెరకెక్కిన ‘కేశవ’ మీద మంచి అంచనాలున్నాయి. దీని ఫస్ట్ లుక్ పోస్టర్.. టీజర్.. మిగతా పోస్టర్లు అన్నీ జనాల్ని బాగా ఆకట్టుకున్నాయి. సినిమా మీద ఆసక్తి పెంచాయి. ఉద్రేకం తెచ్చుకుంటే ప్రాణాలు కోల్పోయే విచిత్రమైన వ్యాధి ఉన్న కుర్రాడు.. ప్రశాంతంగా తన ప్రత్యర్థులపై ప్రతీకారం తీర్చుకునే కథతో తెరకెక్కిన సినిమా ఇది. అభిషేక్ నామా నిర్మించాడు.

Like Us on Facebook : https://www.facebook.com/Tupakidotcom/