కిరాక్ పార్టీ.. ఆ రోజు లేనట్లేనా?

యువ కథానాయకుడు నిఖిల్ కొత్త సినిమా ‘కిరాక్ పార్టీ’ రిలీజ్ సంగతి అయోమయంగా ఉంది. ఈ సినిమాను ఫిబ్రవరి 9న రిలీజ్ చేయబోతున్నట్లు చాన్నాళ్ల కిందటే ప్రకటించారు. తర్వాత ఎప్పుడూ రిలీజ్ డేట్ మారుస్తున్నట్లు ప్రకటించలేదు. కానీ చూస్తుండగానే రిలీజ్ డేట్ దగ్గరికొచ్చేసింది. ఇక వారమే గ్యాప్ ఉంది. కానీ ఇప్పుడు రిలీజ్ డేట్ గురించే మాట్లాడట్లేదు. ప్రమోషన్ల జోరు కనిపించట్లేదు. చాన్నాళ్ల సైలెన్స్ తర్వాత మొన్న హడావుడిగా ఒక ట్రైలర్ లాంచ్ చేశారు. ఆ ట్రైలర్లోనే రిలీజ్ డేట్ కూడా కన్ఫమ్ చేస్తారనరి.. కొత్తగా రిలీజ్ డేట్ పోస్టర్లు కూడా లాంచ్ చేస్తారని... ప్రమోషన్ల జోరు పెంచుతారని ఆశించారు. కానీ అలాంటిదేమీ జరగలేదు.

ట్రైలర్ లాంచ్ తర్వాత నిఖిల్ సహా యూనిట్ సభ్యులంతా సైలెంటైపోయారు. మరోవైపు ఫిబ్రవరి రెండో వారాంతానికి షెడ్యూలైన మిగతా సినిమాలన్నీ ప్రమోషన్లలో దూసుకెళ్తున్నాయి. విడుదలకు సన్నాహాలు చేసుకుంటున్నాయి. మరోవైపు ‘కిరాక్ పార్టీ’ టీం ఏమో ఇంకా పోస్ట్ ప్రొడక్షన్ పనుల్లోనే బిజీగా ఉందంటున్నారు. ఈ వీకెండ్లో ఒకటికి రెండు సినిమాలు మంచి క్రేజ్ మధ్య రిలీజవుతున్నాయి. వచ్చే వారాంతానికి ఆల్రెడీ మూడు సినిమాలు కన్ఫమ్ అయ్యాయి. ఇన్నింటికి థియేటర్లు సర్దుబాటు చేయడం కష్టంగా ఉంది. తక్కువ థియేటర్లతో సరిపెట్టుకోవాలి. దీనికి తోడు ఇంత పోటీ మధ్య వస్తే తమ సినిమా కిల్ అయిపోతుందని.. ఇలాంటి యూత్ ఫుల్ మూవీని సోలోగా రిలీజ్ చేస్తే మంచి ఫలితం ఉంటుందని భావిస్తోందట చిత్ర బృందం. అందుకే సినిమాను వాయిదా వేయడానికి దాదాపుగా నిర్ణయం తీసుకున్నట్లు చెబుతున్నారు.