టెన్షన్స్ అచ్చొస్తాయ్.. ఎంత నమ్మకమో

ప్రశాంతంగా పని చేసుకుపోవాలని అందరూ కోరుకుంటారు. ముఖ్యంగా తమ సినిమా రిలీజ్ కు ఎలాంటి అడ్డంకి రాకూడదని.. హీరో- దర్శకుడు- నిర్మాత అనుకోవడంలో ఆశ్చర్యం లేదు. కానీ సినిమా రిలీజ్ అనుకున్న ప్రతీ సారి ఓ హీరోకు ఏదో ఒక టెన్షన్ వస్తోంది.

యంగ్ హీరో నిఖిల్ సినిమాలు.. షూటింగ్ ను స్మూత్ గానే పూర్తి చేసుకున్నా.. విడుదల సమయానికి సమస్యలు వస్తున్నాయి. ఎక్కడకి పోతావు చిన్నవాడా అనే మూవీని రిలీజ్ కి షెడ్యూల్ చేస్తే.. దేశంలో పెద్ద నోట్ల రద్దు అంశం వచ్చిపడింది. అయినా సరే ఎంతో ధైర్యంగా ఈ సినిమాను రిలీజ్ చేసి సక్సెస్ కొట్టాడు నిఖిల్ సిద్ధార్ధ్. ఇప్పుడు కిరాక్ పార్టీ సినిమాను రిలీజ్ కి రెడీ చేస్తే.. దక్షిణాది సినీ పరిశ్రమ మొత్తం స్తంభించిపోయింది. దాదాపు వారం రోజుల పాటు థియేటర్లలో సినిమాలు ప్రదర్శనకు నోచుకోలేదు. అయినా సరే మళ్లీ ధైర్యం చేసేసి.. కిర్రాక్ పార్టీని మార్చ్ 16న విడుదల చేయబోతున్నట్లు తేల్చేశాడు నిఖిల్.

ఇప్పుడు వివాదం సద్దుమణగడంతో రిలీజ్ కి ఇబ్బంది లేదు కానీ.. ప్రతీసారి ఏదో ఒక టెన్షన్ ఎదురవడం మాత్రం తనకు బాగా సెంటిమెంట్ అయిపోయిందని అంటున్నాడు నిఖిల్. అంతే కాదు.. ఇలా రిలీజ్ కు ముందు టెన్షన్ పరిస్థితులను ఎదుర్కున్న సినిమాలు సూపర్ సక్సెస్ అవుతున్నాయంటూ తన విజయ రహస్యం కూడా చెప్పాడు. ఇబ్బందిని కూడా ఇంత వైనంగా అన్వయించుకున్న నిఖిల్ ని పొగడాల్సిందే.