‘శంకరాభరణం’లో లోపాలున్నాయి - నిఖిల్

గత శుక్రవారం విడుదలైన ‘శంకరాభరణం’ సంగతేంటో తొలి ఆటకే తేలిపోయింది. ఎక్కువగా నెగెటివ్ కామెంట్సే వినిపించాయి ఈ సినిమా గురించి. మామూలుగా అయితే ఈ సినిమాకు ఈ స్థాయిలో నెగెటివ్ కామెంట్స్ పడేవి కావు కానీ.. ఈ సినిమా టీం చూపించిన కాన్ఫిడెన్స్.. కోన వెంకట్ మాటలు.. నిఖిల్ మీద ప్రేక్షకులకున్న నమ్మకం.. సినిమా మీద భారీ అంచనాలు పెట్టుకునేలా చేసింది. కానీ ‘శంకరాభరణం’ ఆ అంచనాల్ని ఏమాత్రం అందుకోకపోవడంతో జనాలు తీవ్రంగా నిరాశ చెందారు. వరుసగా వైవిధ్యమైన సినిమాలు చేస్తూ ప్రేక్షకుల్లో మంచి గుర్తింపు సంపాదించుకున్న నిఖిల్.. ఇలాంటి సినిమా చేశాడేంటా అన్న అభిప్రాయాలు జనాల్లో వ్యక్తమయ్యాయి.

ఈ విషయంలో నిఖిల్ నిజాయితీగా ఓ విషయం ఒప్పుకున్నాడు. శంకరాభరణం సినిమాలో లోపాలున్న మాట వాస్తవమే అన్నాడు. ఐతే ఇది అంతా తెలిసే చేసిన ఒక కాన్షియస్ అటెంప్ట్ అని చెప్పాడు. ఒక ఎంటర్ టైనర్ చేయాలన్న ఉద్దేశంతోనే ‘శంకరాభరణం’లో నటించానని చెప్పాడు. ‘‘ఫస్ట్ వీకెండ్ మా సినిమా సాధించిన వసూళ్ల లెక్కలు చూస్తే నాపై జనాలు ఎంత ప్రేమ చూపిస్తున్నారో అర్థమైంది. ఇది నా అదృష్టం. శంకరాభరణంలో లోపాలున్న మాట వాస్తవం. కానీ కొంచెం మార్పు కోసం ఓ ఎంటర్ టైనర్ చేద్దామన్న ఉద్దేశంతోనే ఈ సినిమాలో నటించాను. ఇకపై ప్రేక్షకుల్ని మెప్పించడానికి మరింతగా కష్టపడతాను. వైవిధ్యమైన సినిమాలే చేస్తాను. ఇది నా ప్రామిస్’’ అని ట్వీట్ చేశాడు నిఖిల్. కుర్రాడి మాటల్ని బట్టి చూస్తుంటే ఇకపై ‘శంకరాభరణం’ టైపు సినిమాలు చేయనన్న అర్థం ధ్వనిస్తోంది కదూ!