ట్రెండింగ్ డైలాగ్.. దయ్యాలు కూడా పవన్ ఫ్యాన్సా

ఒకప్పుడు సీనియర్ ఎన్టీఆర్.. మెగాస్టార్ చిరంజీవిల రెఫరెన్సులు ఎక్కువగా కనిపించేవి తెలుగు సినిమాల్లో. ఈ మధ్య పవర్ స్టార్ పవన్ కళ్యాణ్ ప్రస్తావన బాగా పెరిగింది. పవర్ స్టార్ ను ఎవరి స్థాయిలో వాళ్లు బాగానే వాడేసుకుంటున్నారు. ఈ రోజే విడుదలైన ‘ఎక్కడికి పోతావు చిన్నవాడా’లో సైతం పవన్ కళ్యాణ్ ను ఫుల్లుగా వాడేశారు. రెస్పాన్స్ కూడా బాగానే ఉందిలెండి. ఈ సినిమాలో హీరోయిన్ పవన్ కళ్యాణ్ ఫ్యాన్. మెడమీద చేయి వేసి రుద్దుకునే మేనరిజం కూడా పెట్టారు ఆ అమ్మాయికి. హీరోయిన్ చనిపోయి దయ్యం అవుతుంది. దయ్యంగా మారాక తెరమీద గబ్బర్ సింగ్ టైటిల్ సాంగ్ వస్తుంటే.. లేచి డ్యాన్స్ ఇరగదీస్తుంది. అప్పుడు ఓ డైలాగ్ వస్తుంది.. ‘’దయ్యాలు కూడా పవన్ కళ్యాణ్ ఫ్యాన్సా’’ అని. ఆ డైలాగుకి థియేటర్లలో రచ్చ రచ్చే.

ఇంకా మరికొన్ని సన్నివేశాల్లోనూ పవన్ కళ్యాణ్ రెఫరెన్సులు కనిపిస్తాయి. మరోవైపు దర్శక ధీరుడు రాజమౌళిని కూడా బాగానే వాడుకున్నారిందులో. హీరో గ్రాఫిక్ డిజైనర్. బాహుబలి సినిమాకు తాను పని చేస్తున్నట్లు చెప్పుకుంటాడు. రాజమౌళితో మీటింగ్ అని హీరోయిన్ కు అబద్ధం చెబుతాడు. కానీ హీరోయిన్ టీవీ పెడితే రాజమౌళి ఇంటర్వ్యూ లైవ్లో కనిపిస్తుంది. తెరమీద రాజమౌళిని చూపించినపుడు కూడా థియేటర్లలో మంచి రెస్పాన్సే కనిపిస్తోంది. మొత్తానికి అటు పవన్ కళ్యాణ్ ను.. ఇటు రాజమౌళిని తమ సినిమా కోసం బాగానే వాడుకుంది ‘ఎక్కడికి పోతావు చిన్నవాడా’ టీం. సినిమాకు టాక్ కూడా పాజిటివ్ గా ఉండటంతో ఇవి కూడా కలిసొచ్చేలా ఉన్నాయి. నిఖిల్ కెరీర్లోనే పెద్ద హిట్లలో ఇదొకటిగా నిలిచే అవకాశాలున్నాయి.

Like Us on Facebook : https://www.facebook.com/Tupakidotcom/