నితిన్ జోడీగా సాయిపల్లవి .. నిజమేనా?

వెండితెరపై స్కిన్ షో చేయకుండా .. నేను ఇలాగే కనిపిస్తాను అంటూ రాణించిన కథానాయికలు కొందరే ఉన్నారు. అలాంటివారిలో సాయిపల్లవి ఒకరు. తనకి నచ్చిన కథలకు .. పాత్రలకు మాత్రమే ఆమె గ్రీన్ సిగ్నల్ ఇస్తుంది. పారితోషికం గురించి కాకుండా పాత్రను గురించి ముందుగా తెలుసుకునే కథానాయికగా ఇండస్ట్రీలో ఆమెకి మంచి పేరు ఉంది. నటన పరంగా .. డాన్స్ పరంగా సాయిపల్లవికి వస్తున్న క్రేజ్ కి గ్లామరస్ హీరోయిన్స్ సైతం టెన్షన్ పడుతున్నారంటే, సాయిపల్లవి ఏ రేంజ్ లో దూసుకుపోతుందో అర్థం చేసుకోవచ్చు. 'ఫిదా' .. 'మిడిల్ క్లాస్ అబ్బాయి' సినిమాలు ఆమె నటనకు అద్దం పడతాయి.

అలాంటి సాయిపల్లవి ప్రస్తుతం తెలుగులో వరుస సినిమాలతో బిజీగా ఉంది. 'లవ్ స్టోరీ' .. 'విరాటపర్వం' సినిమాలు విడుదలకి ముస్తాబవుతూ ఉండగా, నాని సరసన చేస్తున్న 'శ్యామ్ సింగ రాయ్' షూటింగు దశలో ఉంది. ఇక ఆ తరువాత ఆమె డేట్స్ కోసం చాలామంది దర్శక నిర్మాతలు వెయిటింగులో ఉన్నారు. వాళ్లలో ఒక యువ దర్శకుడు ఆమెకి కథ వినిపించి ఒప్పించేందుకు మరింత గట్టిగా ట్రై చేస్తున్నట్టుగా తెలుస్తోంది. ఇంతకీ ఎవరి జోడీగా అంటే, హీరో నితిన్ జోడీగా అనే టాక్ బలంగా వినిపిస్తోంది.

అవును .. ప్రస్తుతం నితిన్ ఒక రేంజ్ లో తన దూకుడు చూపుతున్నాడు. క్రితం ఏడాది 'భీష్మ' హిట్ అందుకున్న ఆయన, తాజాగా 'రంగ్ దే' సినిమాతో సక్సెస్ ను సొంతం చేసుకున్నాడు. ఆ వెంటనే మేర్లపాక గాంధీ దర్శకుడిగా 'మాస్ట్రో' సినిమాను ప్రకటించాడు. వక్కంతం వంశీ దర్శకత్వంలోను ఒక సినిమా చేయనున్నట్టు ప్రచారం జరుగుతోంది. ఈ నేపథ్యంలో మరో యువ దర్శకుడు కూడా నితిన్ కి కథ వినిపించి ఓకే చేయించుకున్నాడని అంటున్నారు. నితిన్ జోడీగా ఆయన సాయిపల్లవిని అనుకుని, ఆమెకి కథ వినిపించే పనిలో ఉన్నాడని చెప్పుకుంటున్నారు. మొత్తానికి సాయిపల్లవి టాలీవుడ్ లోని యంగ్ హీరోలందరినీ చుట్టబెట్టేస్తోందన్న మాట!