అ..ఆ.. ఆరంభం అదుర్సే

మాటల మాంత్రికుడు త్రివిక్రమ్ దర్శకత్వంలో రూపొందిన అ..ఆ.. చిత్రం ప్రేక్షకుల ముందుకు వచ్చేసింది. అన్ని ఏరియాల నుంచి సినిమాకి మంచి రిపోర్టులే వస్తున్నాయి. రివ్యూలు - రేటింగులు కూడా అ..ఆ..కు అనుకూలంగానే ఉండడం విశేషం. మౌత్ టాక్ కూడా పాజిటివ్ గా ఉండడంతో.. ఆ..ఆ.. ఆరంభం అదిరిపోయేలా ఉందని చెప్పాలి.

ప్రధానంగా నైజాం ఏరియాలో సూపర్బ్ స్టార్టింగ్ లభించింది. తెలంగాణ ఆవిర్భావ దినోత్సవం సందర్భంగా రాష్ట్రమంతటా హాలిడే కావడంతో.. ఓపెనింగ్స్ చాలా బాగున్నాయి. జిల్లాలతో అన్ని ఏరియాల్లోనూ హౌజ్ ఫుల్ కలెక్షన్స్ వస్తుండడం విశేషం. ఆంధ్ర - సీడెడ్ ఏరియాల్లో కూడా నైజాం అంతగా కాకపోయినా.. మంచి ఓపెనింగ్సే వస్తున్నాయి. తొలి రోజున రెండు తెలుగు రాష్ట్రాల్లో కలిపి దాదాపు 5 కోట్ల వరకూ షేర్ వచ్చే అవకాశముందని అంటున్నాయి ట్రేడ్ వర్గాలు.

ఓవర్సీస్ లో బ్లాక్ బస్టర్ ఓపెనింగ్ లభించిందని చెప్పాల్సిందే. కేవలం ప్రీమియర్స్ ద్వారానే 2.60 లక్షల డాలర్ల కలెక్షన్స్ రావడం విశేషం. రిపోర్టులు కూడా బాగుండడం, ఇంకా వీకెండ్ మూడు రోజులు ఉండడంతో.. కలెక్షన్స్ పెరిగే ఛాన్సులు ఉన్నాయి. ఓవర్సీస్ కి సంబంధించినంతవరకూ త్రివిక్రమ్ మ్యాజిక్ తో ఇక్కడ సంచలనాలు సృష్టించచ్చని అంటున్నారు. బీ - సీ సెంటర్లలో మాత్రం లాంగ్ రన్ విషయంలో డిస్ట్రిబ్యూటర్ల నుంచి సందేహాలు వ్యక్తమవుతున్నా.. వీకెండ్ ముగిసేనాటికి వీటిపై ఓ క్లారిటీ వచ్చేయనుంది.