ఎన్టీఆర్-చెర్రీ కంటే ముందే నితిన్-శర్వా

యంగ్ టైగర్ ఎన్టీఆర్ - రామ్ చరణ్ తో కలిసి దర్శక ధీరుడు రాజమౌళి మల్టీ స్టారర్ సినిమా చేయనున్నారనే మాట ఇండస్ట్రీలో గట్టిగానే వినిపిస్తోంది. ఈ హీరోలిద్దరితో కలిసి ఉన్న ఫొటోను జక్కన్న సోషల్ మీడియాలో షేర్ చేసిన పోస్టు క్షణాల్లో వైరల్ గా మారింది. దీనిపై రాజమౌళి ఏమీ నోరు విప్పకపోయియా మల్టీ స్టారర్ ఆశలకు మాత్రం జీవం పోసింది.

తాజాగా ఇండస్ట్రీలో ఇద్దరు యంగ్ హీరోలు కలిసి సినిమా చేసేందుకు సిద్ధమవుతున్నారని తెలుస్తోంది. నితిన్ - శర్వానంద్ కాంబినేషన్ లో ఓ సినిమా తీసేందుకు దువ్వాడ జగన్నాథమ్ ఫేం డైరెక్టర్ హరీష్ శంకర్ రెడీ అవుతున్నాడనేది లేటెస్ట్ టాక్. ఇప్పటికీ ఈ హీరోలిద్దరినీ కలిసి సబ్జెక్ట్ లైన్ వినిపించాడని.. వాళ్లిద్దరి నుంచి పాజిటివ్ రెస్పాన్స్ వచ్చిందని హరీష్ శంకర్ సన్నిహితులు చెబుతున్నారు. స్క్రిప్ట్ నచ్చితే మల్టీస్టారర్ చేస్తామని నితిన్ - శర్వా చెప్పడంతో ప్రస్తుతం కథకు తుది మెరుగులు దిద్ది స్క్రిప్ట్ రెడీ చేసే పనిలో పడ్డాడని అంటున్నారు. అనుకున్నవన్నీ వర్కవుటయితే ఈ సినిమా వచ్చే ఏడాదిలో మొదలయ్యే అవకాశముంది.

సాధారణంగా మల్టీ స్టారర్ సినిమాలకు బాలీవుడ్ పెట్టింది పేరు. మిగతా విషయాల్లో కాలంతోపాటు వేగంగా మారిపోతుండే టాలీవుడ్ మల్టీ స్టారర్ విషయంలో మాత్రం కాస్తంత వెనుకబడే ఉంటుంది. కలిసి నటించడం తమకు ఇష్టమే కానీ తగిన సబ్జెక్టు దొరకలేదంటూ మాటల్తో సరిపెట్టేవారు. ఈ ట్రెండ్ ఇప్పుడిప్పుడే కాస్త మారుతోంది. రాజమౌళి - హరీష్ శంకర్ ల సినిమాల షూటింగ్ లు స్టార్టయితే మరిన్ని మల్టీస్టారర్ సినిమాలు పట్టాలెక్కడం ఖాయం.