సూర్యని సొంతంచేసుకున్న నితిన్

మన టాలీవుడ్ లో కొందరు తారలు కేవలం నటనకు మాత్రమే అంటిబెట్టుకోకుండా సినిమాని వ్యాపకంగా మార్చుకుని వ్యాపార సూత్రాలను అవలంభించుకున్నారు. ఇటువంటి వారి పేర్లలో కింగ్ నాగార్జున ప్రధమంగా వినిపిస్తారు. ఆయన బాటలోనే యువహీరో నితిన్ కూడా నడుస్తుండడం విశేషం. తండ్రి అందించిన నిర్మాణ సంస్థ వారసత్వాన్ని కొనసాగిస్తూ అటు హీరోగా, ఓ పక్క నిర్మాతగా మరోపక్క పంపిణీదారుడిగా దుమ్ములేపుతున్నాడు.

తన సినిమాలతో బిజీగా వుంటూనే నిర్మాణంపై దృష్టిపెట్టడం చిన్న విషయంకాదు. ప్రస్తుతం త్రివిక్రమ్ సినిమాలో నటించనున్న నితిన్ తన సొంత నిర్మాణ సంస్థలో అఖిల్ - వినాయక్ కాంబినేషన్ లో తెరకెక్కుతున్న భారీ బడ్జెట్ సినిమాను నిర్మిస్తున్నాడు. ఈ సినిమా ప్రస్తుతం ఇండస్ట్రీ లో హాట్ టాపిక్ గా మారింది.

నిర్మాతతో ఆగక డిస్ట్రిబ్యూషన్ పై కూడా నితిన్ కన్నేశాడు. మనం సినిమాతో లైం లైట్ లోకి వచ్చిన దర్శకుడు విక్రమ్ కుమార్ ప్రస్తుతం తమిళనటుడు సూర్యతో '24' అనే సినిమా తీస్తున్న విషయం తెలిసినదే. ఈ చిత్రానికి సంబంధించిన తెలుగు హక్కులను గ్లోబల్ ఫిల్మ్స్ సంస్థతో సంయుక్తంగా సంపాదించినట్టు ట్విట్టర్ లో వెల్లడించాడు. గుడ్ లక్ నితిన్...