నితిన్ సినిమా సైన్స్ ఫిక్షనా?

‘లై’ సినిమా మీద ఎన్నో ఆశలు పెట్టుకున్నాడు నితిన్. ఆ సినిమాతో తన కెరీర్ మరో స్థాయికి వెళ్తుందని అనుకుంటే.. తిరోగమన బాట పట్టింది. హను రాఘవపూడితో కలిసి నితిన్ కొత్తగా ఏదో ట్రై చేశాడు కానీ.. అది ప్రేక్షకులు మెచ్చలేదు. ఈ ప్రయోగం తర్వాత నితిన్ కమర్షియల్ సినిమా ఏదైనా ట్రై చేస్తాడేమో అని అంతా అనుకున్నారు. కానీ అతను ఈసారి కూడా కొంచెం కొత్తగానే ట్రై చేస్తున్నట్లు కనిపిస్తోంది. నితిన్ కొత్త సినిమా ‘చల్ మోహన రంగ’ ఫస్ట్ లుక్ ఈ రోజే విడుదలైన సంగతి తెలిసిందే. ఫస్ట్ లుక్ మామూలుగానే అనిపిస్తోందికానీ.. టైటిల్ లోగో చూస్తే మాత్రం ఇది భిన్నమైన సినిమాలాగే కనిపిస్తోంది.

టైటిల్ పక్కన ‘ఎవ్రీథింగ్ ఈజ్ ఎ సైన్’ అనే క్యాప్షన్ ఉన్నపుస్తకం.. చక్రం లాంటి బొమ్మ.. లవ్ సింబల్స్.. బాటిల్.. కుక్క.. ఇవన్నీ ఉన్నాయి. ‘ఎవ్రీథింగ్ ఈజ్ ఎ సైన్’ అనడం ద్వారా ఇదొక సైన్స్ ఫిక్షన్ మూవీ అనే సంకేతాలు ఇస్తున్నట్లుగా ఉంది. టైటిల్ లోగోలో కనిపించిన సంకేతాల చుట్టూనే సినిమా తిరిగేలా కనిపిస్తోంది. లిరిసిస్టుగా పరిచయమై ఉన్నట్లుండి దర్శకుడిగా టర్న్ తీసుకున్న కృష్ణచైతన్య.. తొలి సినిమా ‘రౌడీ ఫెలో’తో తాను భిన్నమైన దర్శకుడినని రుజువు చేసుకున్నాడు. త్రివిక్రమ్ సైతం ఈ సినిమాను మెచ్చాడు. ఇప్పుడు త్రివిక్రమ్ రచనా సహకారంతో కృష్ణచైతన్య తీస్తున్న సినిమా మరింత కొత్తగా ఉండేలా కనిపిస్తోంది. ఈ సినిమా టీజర్ ఇంకో రెండు రోజుల్లోనే రాబోతోంది. అది చూశాక సినిమాపై ఒక ఐడియా వస్తుందేమో.