మోహన్ రంగా.. మురిపిస్తావా?

తన ఆరాధ్య కథానాయకుడు పవన్ కళ్యాణ్ లాగే దశాబ్దం పాటు సరైన విజయం లేకుండా అల్లాడిపోయాడు యంగ్ హీరో నితిన్. కానీ ‘ఇష్క్’తో అతడి కెరీర్ మలుపు తిరిగింది. అక్కడి నుంచి మళ్లీ ఫాలోయింగ్ పెంచుకుని ఒక స్థాయిలో నిలబడ్డాడు. మధ్య మధ్యలో ఎదురు దెబ్బలు తగిలినా నితిన్ ఫాలోయింగ్ మంచి రేంజిలోనే ఉంది. అతడి సినిమాలకు ఈజీగా 20-25 కోట్ల మధ్య బిజినెస్ అవుతోంది. నితిన్ న్యూ మూవీ ‘చల్ మోహన్ రంగ’ కూడా టేబుల్ ప్రాఫిట్ తో రిలీజ్ కు రెడీ అయింది. క్రేజీ కాంబినషన్ కారణంగా ఈ చిత్రంపై ముందు నుంచి పాజిటివ్ బజ్ ఉంది. దీనికి తోడు సమ్మర్ సీజన్లో ఈ చిత్రం బాక్సాఫీస్ బరిలోకి దిగుతోంది.

స్టూడెంట్స్ బ్యాచులు బ్యాచులుగా పరీక్షలు ముగించుకుని థియేటర్లలోకి దూకే సీజన్ ఇది. అందులోనూ ‘చల్ మోహన్ రంగ’ పూర్తి స్థాయి యూత్ ఫుల్ మూవీ కావడం కూడా దీనికి కలిసొచ్చే విషయమే. ‘రంగస్థలం’ ఆల్రెడీ థియేటర్లలో అదరగొడుతున్నప్పటికీ.. దానికి ‘చల్ మోహన్ రంగ’కు పోలిక లేదు. ఇది క్లాస్ లవ్ స్టోరీ. ఫుల్ ఎంటర్టైన్మెంట్ తో తెరకెక్కిన సినిమా. ఇలాంటి సినిమాలు యువతను బాగా ఆకర్షిస్తాయి. అందుకే దీని బుకింగ్స్ కూడా బాగున్నాయి. ఈ చిత్రానికి ఓ మోస్తరుగా పాజిటివ్ టాక్ వచ్చినా.. మంచి వసూళ్లు దక్కుతాయి. వీకెండ్లో సినిమా నిలిస్తే బ్రేక్ ఈవెన్ కు దగ్గరగా వచ్చేస్తుంది. మరి ఈ చిత్రం అంచనాల్ని అందుకుంటుందేమో చూడాలి. త్రివిక్రమ్ కథతో కృష్ణచైతన్య తెరకెక్కించిన ఈ చిత్రంలో నితిన్ సరసన మేఘా ఆకాష్ నటించింది.