'రంగ్ దే' మ‌రో భీష్మ అవుతుందా?

కొన్ని వ‌రుస‌ ప‌రాజయాల త‌ర్వాత బ్లాక్ బ‌స్ట‌ర్ కొడితే ఆ ఆనందం అంతా ఇంతా కాదు. అలాంటి అనుభ‌వాలు నితిన్ కి కొత్తేమీ కాదు. దాదాపు 16 ఫ్లాప్ ల త‌ర్వాత ఇష్క్ చిత్రంతో బ్లాక్ బ‌స్ట‌ర్ కొట్టిన నితిన్ అటుపై గుండె జారి గల్లంత‌య్యిందే.. హార్ట్ ఎటాక్ లాంటి చిత్రాల‌తో హిట్లు కొట్టి హుషారు పెంచుకున్నాడు. అయితే కాల‌క్ర‌మంలో నితిన్ మ‌ళ్లీ ట్రాక్ త‌ప్పాడు. వ‌రుస‌గా ప‌రాజ‌యాలు ఊపిరి స‌ల‌ప‌నివ్వ‌లేదు. ముఖ్యంగా లై.. శ్రీ‌నివాస క‌ళ్యాణం లాంటి చిత్రాల‌పై ఎన్నో ఆశ‌లు పెట్టుకుంటే తీవ్రంగా నిరాశ‌ప‌రిచాయి.

ఇక కెరీర్ డైల‌మా నుంచి బ‌య‌ట‌ప‌డాల్సిన టైమ్ లో భీష్మ లాంటి బంప‌ర్ హిట్ అందుకున్నాడు. వెంకీ కుడుముల అత‌డికి చుక్కానీలా క‌నిపించాడు. మ‌రి ఈ బ్లాక్ బ‌స్ట‌ర్ హుషారులోనే తాను ప్రేమించిన స‌ఖిని పెళ్లాడేందుకు రెడీ అవుతున్నాడు. ఇది క‌లిసొచ్చే త‌రుణ‌మే. ఇంత‌వ‌ర‌కూ ఓకే కానీ నెక్ట్స్ ఏంటి? అంటే నితిన్ బ్యాక్ టు బ్యాక్ హిట్లు కొట్టి స‌త్తా చాటుతాడా? అన్న ప్ర‌శ్న ఫ్యాన్స్ ని టెన్ష‌న్ పెడుతోంది.

ప్ర‌స్తుతం అత‌డు రంగ్ దే చిత్రంలో న‌టిస్తున్నాడు. ఈ చిత్రంలో కీర్తి సురేష్ క‌థానాయిక‌. ఇష్క్ చిత్రానికి సినిమాటోగ్ర‌ఫీ అందించిన ది గ్రేట్ పీసీ శ్రీ‌రామ్ మ‌రోసారి నితిన్ కోసం బ‌రిలో దిగారు. దేవీశ్రీ ప్ర‌సాద్ ఈ చిత్రానికి సంగీతం అందిస్తున్నారు. తొలి ప్రేమ‌తో హిట్టు కొట్టి మిస్ట‌ర్ మ‌జ్నుతో ఫ్లాప్ ఎదుర్కొన్న వెంకీ అట్లూరి ఈ చిత్రానికి దర్శ‌క‌త్వం వ‌హిస్తున్నారు. 29 సాయంత్రం రంగ్ దే ఫ‌స్ట్ లుక్ రిలీజ్ కానుంది. ఇక ఇప్ప‌టికే క‌రోనా సెల‌వుల్ని మ‌న నిర్మాత‌లు తెలివిగా సినిమాల ప్ర‌చారానికి ఉప‌యోగించుకుంటున్నారు. ఆ కోవ‌లోనే రంగ్ దే చిత్రాన్ని నిర్మిస్తున్న సితార ఎంట‌ర్ టైన్ మెంట్స్ నితిన్ ఫ్యాన్స్ లో హుషారు పెంచేందుకు తాజాగా ఫ‌స్ట్ లుక్ ని ప్లాన్ చేసింద‌న్న‌మాట‌. ఫ‌స్ట్ ఇంప్రెష‌న్ ఈజ్ బెస్ట్ ఇంప్రెష‌న్ అంటారు. మ‌రి ఆ ఇంప్రెష‌న్ రంగ్ దే పోస్ట‌ర్ పై ప‌డుతుందా? లేదా? అన్న‌ది చూడాలి. ఇక ఇష్క్ త‌ర్వాత బ్యాక్ టు బ్యాక్ హిట్ల‌తో ఫామ్ లోకి వ‌చ్చిన‌ట్టే మ‌ళ్లీ నితిన్ బ్యాక్ టు బ్యాక్ బ్లాక్ బ‌స్ట‌ర్లు కొడ‌తాడా? అన్న‌ది చూడాలి.