అవును.. నితినే రిలీజ్ చేస్తున్నాడు

నితిన్ హీరోనే కాదు.. నిర్మాత కూడా. ఈ మధ్యే ‘అఖిల్’ సినిమాను తనే నిర్మించిన సంగతి తెలిసిందే. నితిన్ తండ్రి ఇంకా చాలా సినిమాలే తీశాడు. ఐతే ఇప్పటిదాకా నితిన్ బేనర్లో డైరెక్ట్ తెలుగు సినిమాలే వచ్చాయి. ఇప్పుడు తొలిసారి ఓ తమిళ డబ్బింగ్ మూవీని తెలుగులో రిలీజ్ చేయబోతున్నాడు నితిన్. సూర్య హీరోగా ‘మనం’ ఫేమ్ విక్రమ్ కె.కుమార్ దర్శకత్వంలో తెరకెక్కుతున్న ‘24’ మూవీని నితిన్ రిలీజ్ చేయబోతున్నాడు. నితిన్ ఈ మూవీ రైట్స్ తీసుకున్నట్లు ఇంతకుముందే వార్తలొచ్చాయి కానీ.. ఇప్పుడు అఫీషియల్ కన్ఫర్మేషన్ కూడా వచ్చేసింది.

‘24’ మూవీ రైట్స్ తాను తీసుకున్న విషయాన్ని కన్ఫమ్ చేస్తూ రిలీజ్ డేట్ కూడా వెల్లడించాడు నితిన్. ఏప్రిల్ 14న తమిళ, తెలుగు భాషల్లో ఒకేసారి ఈ చిత్రాన్ని రిలీజ్ చేయబోతున్నట్లు తెలిపాడు నితిన్. మార్చిలో ఆడియో రిలీజ్ చేయబోతున్నట్లు కూడా వెల్లడించాడు. ‘మనం’ తర్వాత విక్రమ్ దర్శకత్వం వహిస్తున్న ఈ చిత్రంపై భారీ అంచనాలే ఉన్నాయి. సూర్య త్రిపాత్రాభినయం చేస్తున్న ‘24’లో సమంత - నిత్యామీనన్ హీరోయిన్లుగా నటిస్తున్నారు. టైమ్ మెషీన్ లాగా పని చేసే వాచ్ నేపథ్యంలో ఈ చిత్రాన్ని తెరకెక్కించాడట విక్రమ్. తమిళంలో సూర్యనే స్వయంగా ఈ సినిమాను నిర్మించడం విశేషం.