వావ్.. కమల్-విక్రమ్ సినిమాలో నితిన్?

ఒక దశాబ్దం పాటు ఫ్లాపులతో అల్లాడిపోయాడు యువ కథానాయకుడు నితిన్. ఐతే ‘ఇష్క్’ దగ్గర్నుంచి అతడి దశ తిరిగింది. ఆ తర్వాత ‘గుండె జారి గల్లంతయ్యిందే’.. ‘అఆ’ లాంటి బ్లాక్ బస్టర్లతో తన స్థాయిని పెంచుకున్నాడతను. విక్రమ్ కుమార్.. త్రివిక్రమ్ శ్రీనివాస్ లాంటి పెద్ద దర్శకులతో అతను సినిమాలు చేశాడు. ఇప్పుడు పవన్ కళ్యాణ్-త్రివిక్రమ్ ల నిర్మాణంలో ‘చల్ మోహన రంగ’ చేస్తున్నాడు. దీని తర్వాత ‘శ్రీనివాస కళ్యాణం’లో నటించనున్నాడు నితిన్. ఇప్పుడు నితిన్ కు మరో బంపరాఫర్ తగిలినట్లుగా వార్తలొస్తున్నాయి. అతను ఓ తమిళ సినిమాలో కీలక పాత్ర పోషించనున్నాడట. ఆ సినిమా చేస్తోందెవరో తెలిస్తే ఆశ్చర్యపోవాల్సిందే.

దిగ్గజ నటుడు కమల్ హాసన్ నిర్మాణంలో విక్రమ్ హీరోగా తెరకెక్కబోయే కొత్త సినిమాలో నితిన్ కు ఒక కీలక పాత్ర ఆఫర్ చేసినట్లు సమాచారం. ఈ చిత్రాన్ని కమల్ హాసన్ శిష్యుడు రాజేష్ సెల్వ రూపొందించనున్నాడు. చాలా ఏళ్లుగా కమల్ దగ్గర పని చేస్తున్న రాజేష్.. తన గురువుతోనే ‘చీకటి రాజ్యం’ సినిమా చేశాడు. ఆ సినిమా పర్వాలేదనిపించింది. ‘చీకటి రాజ్యం’ ఓ ఫ్రెంచ్ థ్రిల్లర్ కు అఫీషియల్ రీమేక్. ఇప్పుడు కూడా మరో ఫ్రెంచ్ మూవీనే ఈ టీం రీమేక్ చేయనుందట. ఇంత పెద్ద కాంబినేషన్లో నితిన్ కు కీలక పాత్ర దక్కడం విశేషమే. ఈ చిత్రం తెలుగులోనూ ఒకేసారి తెరకెక్కనుంది. జిబ్రాన్ సంగీతాన్నందిస్తాడు. ఈ సినిమాలో నితిన్ నటిస్తున్న విషయంపై త్వరలోనే అధికారిక ప్రకటన వచ్చే అవకాశముంది.