నితిన్ పడుతున్న హిట్టు చేపలు

అఆ బ్లాక్ బస్టర్ తర్వాత కథలు దర్శకుల విషయంలో చాలా జాగ్రత్తలు తీసుకుంటున్న నితిన్ ఎట్టి పరిస్థితుల్లో హిట్ కు తగ్గకుండా తన సినిమాలు ఉండేలా ప్లాన్ చేసుకుంటున్నాడు. తీసిన మరియు తీయబోతున్న జాబితా చూస్తే ఈ విషయం స్పష్టంగా అర్థమైపోతుంది. శతమానంభవతి ద్వారా నేషనల్ అవార్డు తో పాటు ప్రేక్షకుల రివార్డులు ప్లస్ కలెక్షన్స్ ఏకకాలంలో కొట్టేసిన సతీష్ వేగ్నేశతో శ్రీనివాస కళ్యాణం ఒప్పుకోవడంలోనే ఈ ఎత్తుగడ కనిపిస్తుంది. క్లీన్ ఫ్యామిలీ ఎంటర్ టైనర్ గా ఆగస్ట్ 9న విడుదల కానున్న దీని మీద మంచి అంచనాలు ఉన్నాయి. హాస్యంతో పాటు సునిశితంగా మానవ సంబంధాలను స్పృశించే సతీష్ దీన్ని కూడా అదే తరహాలో పెళ్లి నేపధ్యంగా తీసాడని ఇప్పటికే పాజిటివ్ ఫీడ్ బ్యాక్ ఉంది.

ఇక దీని తర్వాత ఛలో తో తన ఎంట్రీ ని సూపర్ సక్సెస్ తో ఋజువు చేసుకున్న దర్శకుడు వెంకీ కుడుములుతో భీష్మ అనే టైటిల్ తో నితిన్ హీరోగా ప్రాజెక్ట్ రెడీగా ఉందని గతకొద్ది రోజులుగా వార్తలు వస్తూనే ఉన్నాయి. అధికారికంగా చెప్పలేదు కానీ ఖరారు అయినట్టే. ఇవి కాకుండా ఇటీవలే బాక్స్ ఆఫీస్ దగ్గర యూత్ సెన్సేషన్ గా వసూళ్లు కొల్లగొడుతున్న ఆరెక్స్ 100 దర్శకుడు అజయ్ భూపతిని కూడా నితిన్ లాక్ చేసినట్టుగా టాక్. తండ్రి సుధాకర్ రెడ్డి ద్వారా మధ్యవర్తిత్వం నెరిపి పెద్ద సంస్థల నుంచి ఆఫర్లు వస్తున్నా తనకే చేసేలా ఒప్పించాడని తెలిసింది. కానీ అజయ్ భూపతి దీని గురించి ఇంకా మాట్లాడం లేదు. ఆరెక్స్ 100 ప్రమోషన్ పూర్తయ్యాకే వివరాలు చెబుతాను అంటున్నాడు.

సో నితిన్ చాలా తెలివిగా అడుగులు వేస్తున్నట్టు స్పష్టమవుతోంది. ఒక్క సతీష్ వేగ్నేశను తప్పిస్తే మిగిలిన ఇద్దరూ మొదటి సినిమాతోనే గట్టి విజయం అందుకున్నవాళ్ళు. సతీష్ వేగ్నేశ శతమానం భవతి కన్నా ముందు మూడు సినిమాలు చేసాడు కానీ అవేవి ఫలితాన్ని ఇవ్వలేదు. సో నితిన్ చాలా క్లియర్ గా తనకు సక్సెస్ ఇవ్వగలిగే దర్శకులను భలేగా సెట్ చేసుకుంటున్నాడు.