‘పంజా’ పవన్ కళ్యాణ్ కనిపిస్తున్నాడే...

తెలుగు సినిమాల్లో ఒకప్పుడు మెగాస్టార్ చిరంజీవి పేరును యంగ్ హీరోలు బాగా వాడుకునేవాళ్లు. ఐతే చిరంజీవి నిష్క్రమణ తర్వాత పవన్ కళ్యాణ్ పేరు వాడకం బాగా పెరిగింది. పవన్ పేరును బాగా వాడుకునే యంగ్ హీరోల్లో ముందుగా చెప్పుకోవాల్సింది నితిన్ గురించే. తన ప్రతి సినిమాలోనూ పవన్ రెఫరెన్సుల కోసం ట్రై చేస్తుంటాడు నితిన్. తన అభిమాన కథానాయకుడిగా అనుకరించే ప్రయత్నమూ చేస్తుంటాడు. ఐతే అవి ఒకటి రెండు సన్నివేశాల వరకు పరిమితమవుతుంటాయి. కానీ ఇప్పుడు తన కొత్త సినిమా ‘లై’లో అయితే అచ్చంగా పవన్ కళ్యాణ్ నే తలపించేస్తున్నాడు నితిన్. ఇటీవలే విడుదలైన ‘లై’ టీజర్ చూస్తే పవన్ గుర్తుకు రాకమానడు.

టీజర్ చివర్లో నితిన్ ట్రైన్లోంచి దూకుతూ.. రౌడీని తంతూ కిందికి దూకి నిలబడే సీన్ చూస్తే పవన్ కళ్యాణే కనిపిస్తాడక్కడ. ‘పంజా’ సినిమాలో పవన్ గడ్డంతో.. గాగుల్స్ తో ఎలాంటి లుక్ లో కనిపించాడో.. ఎలాంటి బాడీ లాంగ్వేజ్.. ఎక్స్ ప్రెషన్స్ ఇచ్చాడో.. ఇక్కడ నితిన్ కూడా అలాగే కనిపించాడు. తన ఆరాధ్య కథానాయకుడిని అనుకరించే విషయంలో నితిన్ అసలు మొహమాటాలు పెట్టుకోడు. సిగ్గుపడడు. కాబట్టి సినిమాలో మరింతగా పవన్ మార్కు నితిన్ విన్యాసాలు చూడొచ్చేమో. ఇలాంటి పవర్ స్టార్ అభిమానుల్ని బాగా ఆకర్షిస్తాయి. నితిన్ ను వాళ్లెప్పుడూ ఓన్ చేసుకుంటారు. ‘లై’ మీద ముందు నుంచే మంచి అంచనాలుండగా.. టీజర్ విడుదలయ్యాక అవి మరింత పెరిగాయి. ఈ చిత్రం ఆగస్టు 11న ప్రేక్షకుల ముందుకు రానున్న సంగతి తెలిసిందే.