పెళ్లి వాయిదా నిజ‌మా నితిన్?

యూత్ స్టార్ నితిన్ 2020 ప్ర‌ణాళిక‌ల గురించి తెలిసిందే. పెళ్లితో బ్యాచిల‌ర్ షిప్ కి గుడ్ బాయ్ చెప్పేయ‌బోతున్నాడు. ఇక ఫ్యామిలీ లైఫ్ లోకి ఎంట‌ర్ అయిపోతున్నాడు. షాలినితో నాలుగేళ్ల ప్రేమాయ‌ణానికి ఇప్పుడు ప‌రిపూర్ణ‌త ఆపాదిస్తున్నాడు. ప్రేమించిన షాలినినే నితిన్ పెళ్లి చేసుకుని సంసార సాగ‌రంలోకి అడుగుపెట్ట‌బోతున్నాడు. ఈ స‌మ్మ‌ర్ ట్రీట్ ప్లాన్ చేశాడ‌ని.. ఏప్రిల్ 15న పెళ్లి ముహూర్తం ఫిక్స్ చేశార‌ని ఇప్ప‌టికే క‌థ‌నాలు వచ్చాయి. కేవలం కుటుంబ స‌భ్యులు.. స‌న్నిహితులు..స్నేహితులు స‌మ‌క్షంలో దుబాయ్ లో డెస్టినేష‌న్ త‌ర‌హా వెడ్డింగ్ ప్లాన్ చేసిన‌ట్లు ప్ర‌చారంలో ఉంది.

అంటే పెళ్లికి ఇంకా స‌రిగ్గా రెండు నెలల‌ స‌మ‌యం మాత్ర‌మే మిగిలి ఉంది. అయితే ఇంత‌లోనే మ‌రో కొత్త సంగ‌తి తెలిసిందే. పెళ్లి ముహూర్తాన్ని కొన్నాళ్ల పాటు వాయిదా వేశార‌ని .. ఏప్రిల్ లో కాకుండా మేలో ల‌గ్గం పెట్టుకుందామ‌ని నితిన్ త‌న‌ కుటుంబ స‌భ్యులను కోరాడట‌. అందుకు త‌న ఫ్యామిలీ కూడా ఒకే చెప్పింద‌ని స‌మాచారం. మ‌రి ఈ వాయిదాకి కార‌ణాలు ఏమిటి? అన్న‌ది ఇంకా బ‌య‌ట‌కు రాలేదు. పెళ్లికి పంతులుగారు తొలిగా నిశ్చ‌యించిన ముహూర్తం మంచిద‌ని అంటారు. ఆ త‌ర్వాత పెట్టే ముహూర్తాలు అంత బ‌లంగా ఉండ‌వని పెద్ద‌లు చెబుతుంటారు. కానీ నితిన్ మొద‌టి ముహూర్తాన్ని కాద‌ని రెండ‌వ మూహూర్తాన్ని ఖాయం చేసుకునేలా కనిపిస్తున్నాడు.

ప్ర‌స్తుతం నితిన్ `ఛ‌లో` ద‌ర్శ‌కుడు వెంకీ కుడుములతో `భీష్మ‌` చిత్రంలో న‌టిస్తున్నాడు. అన్ని ప‌నులు పూర్తిచేసి ఈనెల 21న రిలీజ్ చేయ‌నున్నారు. అనంత‌రం నితిన్ పూర్తిచేయాల్సిన మూడు సినిమాలు క్యూలో ఉన్నాయి. చంద్ర శేఖ‌ర్ ఏలేటితో 28వ సినిమాని.. వెంకీ అట్లూరితో 29వ చిత్రం `రంగ్ దే` సెట్స్ కెళ‌తాయి. అలాగే నితిన్ ల్యాండ్ మార్క్ (30వ సినిమా) మూవీ కృష్ణ చైత‌న్య‌తో చేయాల్సి ఉంది. భీష్మ రిలీజ్ త‌ర్వాత చంద్ర శేఖ‌ర్ ఏలేటి సినిమా ముందుగా సెట్స్ కు వెళ్ల‌నుంది.