నితిన్ భయమంతా పవన్ గురించేనట

పవన్ కళ్యాణ్ నిర్మాతగా మారి.. వేరే హీరోతో ఒక సినిమాను ప్రొడ్యూస్ చేస్తాడని ఎవ్వరూ అనుకోలేదు. ఐతే తన వీరాభిమాని నితిన్ తోనే ఆయన సినిమా నిర్మించాడు. అదే.. చల్ మోహన్ రంగ. ఈ చిత్రానికి పవన్ ఆప్త మిత్రుడు త్రివిక్రమ్ శ్రీనివాస్ కూడా నిర్మాణ భాగస్వామి అన్న సంగతి తెలిసిందే. ఆయన కథ కూడా అందించాడు ఈ సినిమాకు. ఈ ఇద్దరి పేర్లు పోస్టర్ మీద ఉంటే సినిమాపై ప్రేక్షకుల్లో ఎంత ఆసక్తి నెలకొంటుందో చెప్పేదేముంది? ఇది తాను గర్వించే విషయం అని చెబుతున్న నితిన్.. అదే సమయంలో తనలో టెన్షన్ పెంచుతున్న విషయం కూడా ఇదే అని చెప్పాడు.

తాను కెరీర్లో ఎన్నో ఎత్తుపల్లాలు చూశానని.. ఫెయిల్యూర్లకు కుంగిపోలేదు కాబట్టే ఇంకా ఇండస్ట్రీలో ఉన్నానని.. ఐతే గతంలో ఏ సినిమాకూ లేనంత టెన్షన్ ‘చల్ మోహన్ రంగ’కు ఉందని నితిన్ చెప్పాడు. సినిమాపై చాలా కాన్ఫిడెంటుగా ఉన్నప్పటికీ.. పవన్.. త్రివిక్రమ్ ఈ చిత్రాన్ని ప్రొడ్యూస్ చేయడం వల్ల వాళ్ల పేర్లు చెడగొట్టకూడదన్న భయం తనలో ఉందని నితిన్ చెప్పాడు. ఐతే వాళ్లిద్దరి పేర్లు నిలబెడతామన్న ఆత్మవిశ్వాసం కూడా తమకు ఉందని నితిన్ చెప్పాడు. ఇక ‘చల్ మోహన్ రంగ’లో పవన్ అతిథి పాత్ర చేశాడన్న ప్రచారం అబద్ధమని చెప్పిన నితిన్.. పవన్ ఈ సినిమాలో లేకపోయినా.. ఉన్న భావనే కలుతుందని.. అదెలా అన్నది తెరమీదే చూసి తెలుసుకోవాలని అన్నాడు. లిరిసిస్ట్ టర్న్డ్ డైరెక్టర్ కృష్ణచైతన్య దర్శకత్వంలో తెరకెక్కిన ఈ చిత్రంలో మేఘా ఆకాశ్ కథానాయికగా నటించింది. ఏప్రిల్ 5న ఈ చిత్రం ప్రేక్షకుల ముందుకొస్తుంది.