అప్పుడు దిల్ రాజు.. ఇప్పుడు నితిన్

కొన్నేళ్లు వెనక్కి వెళ్తే.. అక్కినేని నాగార్జున పెద్ద కొడుకు నాగచైతన్యను తన బేనర్ లో లాంచ్ చేసే అవకాశం దొరికినందుకు ఉబ్బితబ్బిబ్బయిపోయాడు దిల్ రాజు. ‘జోష్’ మూవీని చాలా ప్రతిష్టాత్మకంగా భావించి.. తన బేనర్ లో అప్పటిదాకా తీసిన సినిమాల కంటే ఎక్కువగానే ఖర్చు పెట్టి సినిమా తీశాడు. కానీ ఆ సినిమా బాక్సాఫీస్ దగ్గర బోల్తా కొట్టింది. నాగచైతన్యను సరిగా లాంచ్ చేయలేకపోయాడనే అపప్రదను మూటగట్టుకున్నాడు దిల్ రాజు. చైతూ మాస్ హీరోగా ఎదగలేకపోవడానికి కారణంగా రాజునే చూపిస్తారు అక్కినేని అభిమానులు.

ఐతే పెద్ద కొడుకును సొంత బేనర్ లో లాంచ్ చేయలేకపోయిన నాగార్జున.. చిన్న కొడుకు విషయంలోనూ తను ఛాన్స్ తీసుకోలేదు. ఆ బాధ్యత నితిన్ కు అప్పగించాడు. నితిన్ కూడా ఆ విషయంలో చాలా పొంగిపోయాడు. తన సినిమాలకు పెట్టే బడ్జెట్ కు రెట్టింపు ఖర్చు చేసి అఖిల్ ను లాంచ్ చేస్తున్నాడు. ఐతే దిల్ రాజు ‘జోష్’ విడుదల తర్వాత అక్కినేని అభిమానుల నుంచి ఎలాంటి ఆశీర్వచనాలు అందుకున్నాడో.. ‘అఖిల్’ విడుదలకు ముందే అవి నితిన్ కూ అందుతున్నాయి. తన ప్రమేయం లేని తప్పుకు ఇప్పుడు అఖిల్ బలిపశువు అయిపోతున్నాడు.

అఖిల్ సినిమా వాయిదా పడటంలో నితిన్ ప్రమేయం ఏమీ లేదన్న సంగతి అందరికీ తెలుసు. కానీ నిర్మాత కాబట్టి అతడివైపే వేలెత్తి చూపిస్తున్నారు అఖిల్ అభిమానులు. నితిన్ కు వ్యతిరేకంగా ఆందోళనలు చేయడమే కాక.. అతడి దిష్టిబొమ్మను కూడా దహనం చేశారు. అతణ్ని నమ్మకద్రోహి అని కూడా అన్నారు. ఐతే ‘అఖిల్’ను వాయిదా వేయడం పూర్తిగా నాగార్జున నిర్ణయం అన్న సంగతి అభిమానులు అర్థం చేసుకోకుండా నితిన్ మీద పడటం ఎంత వరకు న్యాయం అన్నది ఇక్కడ ప్రశ్న. మొత్తానికి అక్కినేని ఫ్యామిలీ విషయంలో అప్పుడు దిల్ రాజు చింతించినట్లే.. ఇప్పుడు నితిన్ బాధపడుతున్న పరిస్థితి.